Böyrək sağlamlığını qorumaq üçün bəzən səhərlər etdiyimiz kiçik vərdişlər belə ciddi fəsadlara yol aça bilər. Mütəxəssislər xəbərdar edir: su içmədən günə başlamaq, sidiyi saxlamaq, acqarına ağrıkəsici qəbul etmək, idmandan sonra mayeni bərpa etməmək və səhər yeməyini buraxmaq böyrəklərin yükünü artırır və zamanla onların funksiyasının zəifləməsinə səbəb ola bilər.

KONKRET.az milliaz-a istinadən böyrəkləri zəiflədən 5 səhər vərdişi təqdim edir:

1. Səhər su içməmək

Gecə boyunca orqanizm susuzlaşdığı üçün oyandıqdan sonra ilk növbədə su qəbul etmək çox vacibdir. Qəhvə və çay bədəni daha da susuzlaşdırır və böyrəklərin işini çətinləşdirir. Səhəri bir stəkan su ilə başlamaq toksinlərin xaricini sürətləndirir və filtrasiya prosesini aktivləşdirir.

2. Sidiyi uzun müddət saxlamaq

Sidiyin gecikdirilməsi sidik kisəsinə və böyrəklərə təzyiq yaradaraq infeksiya və hipertoniya riskini artıra bilər. Oyanan kimi sidik kisəsinin boşaldılması böyrək sağlamlığının əsas şərtlərindən biridir.

3. Acqarına ağrıkəsici içmək

Xüsusilə ibuprofen kimi QSİƏP-lərin acqarına qəbulu böyrəkləri yükləyir və davamlı istifadədə zədələnmə yarada bilər. Bu dərmanların yalnız yeməkdən sonra və həkim məsləhəti ilə qəbul edilməsi tövsiyə olunur.

4. Məşqdən sonra maye bərpasını unutmaq

Səhər idmanı faydalıdır, lakin tərlə itirilən mayelər bərpa edilmədikdə böyrəklərə mənfi təsir göstərir. Mütəxəssislər məşqdən sonra təkcə su deyil, həm də elektrolit balansını bərpa edən içkilərin qəbulunu tövsiyə edirlər.

5. Səhər yeməyini buraxmaq

Səhər qida qəbul etməmək sonradan duzlu və emal olunmuş məhsullara olan istəyi artırır ki, bu da yüksək natrium səbəbindən böyrəklərə əlavə yük yaradır. Sadə bir səhər yeməyi yulaf, yumurta və ya meyvə belə, böyrəklərin işini yüngülləşdirə bilər.