1996-cı ilin yayında iki kişinin olduğu kiçik bir qayıq Manş boğazını keçirdi. Qayıqda Kanadadan qaçmış fırıldaqçı Albert Con Uoker və onun iş ortağı Ronald Cozef Platt vardı. İlk baxışdan bu, adi balıq ovu səfərinə bənzəyirdi.
Lakin Uokerin Plattla bağlı dəhşətli planı vardı.
Bir müddət sonra, Platt yatarkən, Uoker əvvəlcə onu boğdu, daha sonra isə cəsədini dəmir lövbərə bağlayaraq dənizin dibinə atdı. O düşünürdü ki, okeanın dərinlikləri cinayətin bütün izlərini əbədi olaraq yox edəcək.
Ancaq qatil mühüm bir detalı nəzərə almamışdı: Plattın biləyində Rolex markalı qol saatı vardı.
Bir neçə həftə sonra dəniz cərəyanları cəsədi sahilə yaxın əraziyə çıxardı. Onu yerli balıqçı aşkar etdi. Mərhumun kimliyini müəyyənləşdirmək mümkün deyildi. Lakin biləyindəki Rolex saatı istintaq üçün ilk ciddi ipucuna çevrildi.
Britaniya polisi saatı diqqətlə araşdırdı və onun unikal seriya nömrəsini müəyyənləşdirdi. Rolex şirkətinin texniki xidmət və təmir qeydləri yoxlanıldıqdan sonra saatın sahibinin Ronald Cozef Platt olduğu üzə çıxdı. Beləliklə, istintaq naməlum meyitin kimliyini müəyyənləşdirə bildi.
Lakin saatın cinayətin açılmasındakı rolu bununla bitmədi.
“Rolex”in su keçirməyən konstruksiyası sayəsində saat uzun müddət su altında qalsa da, işlək vəziyyətdə qalmışdı. Mütəxəssislər onun mexanizmini və dayanma vaxtını araşdıraraq Plattın ölüm vaxtını müəyyənləşdirmək üçün mühüm məlumat əldə etdilər.
Bu kiçik mexaniki şahid polislərə Albert Uokerin izinə düşməyə kömək etdi. Nəticədə qatil yaxalandı və törətdiyi cinayəti etiraf etməyə məcbur oldu.
Albert Con Uoker 1998-ci ildə qətldə təqsirli bilinərək ömürlük həbs cəzasına məhkum edildi.
Beləliklə, cinayətin üstünün açılmasında nə müasir texnologiyalar, nə də mürəkkəb laboratoriya analizləri əsas rol oynadı. Həlledici ipucu okeanın dibindən çıxarılan, təxminən 5 min funt sterlinq dəyərində olan kiçik bir qol saatı idi.
Qatil dənizin bütün izləri siləcəyinə inanırdı. Amma unutduğu bir şey vardı: bəzən ən səssiz şahid belə həqiqəti üzə çıxara bilir.
Ağagül Mürsəlov,
KONKRET.az
Mənbə: Cienciatum Sorpréndete,
BBC World News.