Tovuzda yanmış meyiti tapılan 10 yaşlı Nərminin ölümü ictimaiyyəti sarsıdıb. İnsanlar sosial şəbəkə vasitəsilə azyaşlıının qatilin tezliklə tapılıb cəzalandırmasını tələb edir. Tanınmışlar arasında hadisəyə ilk münasibət bildirənlər jurnalist Xoşqədəm Hidayətqızı, daha sonra deputat Qənirə Paşayeva olub.

KONKRET.az xəbər verir ki, “Səni axtarıram” layihəsinin aparıcısı millət vəkili Qənirə Paşayevanın axtarılan azyaşlının ölümünə reaksiyasını gecikmiş hesab edib və bu iradını onun “Facebook” statusunun altında bildirib:

– Hörmətli Qənirə xanım, mən sizi Nərmin itəndə orada görmək istərdim, ölüsü ortaya çıxdıqdan sonra yox. Həftələrdir bu axtarış gedir. Bəlkə bir az sərt oldu, amma uman yerdən küsərlər. Bağışla!

Q.Paşayeva aparıcının bu iradını belə cavablandırıb:

– Xoşqədəm xanım, mən o dairənin millət vəkili olmasam da, hüquq-mühafizə orqanları ilə hər gün bu barədə danışırdıq. Mənim axtarış imkan və səlahiyyətim yoxdur. Mən daim olaraq maraqlana bilərəm və hüquq-mühafizə orqanları hər gün bu məsələ ilə nə qədər maraqlandığımı çox yaxşı bilir. Əgər sizə maraqlı idisə özümdən və ya onlardan soruşa bilərdiniz. Fikrinizi necə ifadə etmək istəyirsəniz, o cür də ifadə edə bilərsiniz. Amma istədim gerçəkləri biləsiniz.

X.Hidayıtqızı ilə Q.Paşayevanın dialoqu belə davam edib:

– Qənirə Paşayeva, ola bilər, amma bu axtarışda şəxsən iştirak edən biri kimi bunun şahidi olmadığım üçün yazdım. Və bu yazdığımı yalnız sizə yaza bilərəm. Dedim axı, uman yerdən küsərlər”.

– Xoşqədəm Baxşəliyeva, biz hüquq-mühafizə orqanlarına müraciət edirik. Millət vəkili olaraq bu cür addım atmalıyıq. Amma bu prosesdə, sizin fəaliyyətinizdə başqa nəsə edə bilərdiksə, əmin olun, söyləsəniz edərdik. Bunu ən yaxşı siz bilirsiniz. Amma bu cür hadisələrdə biz hüquq-mühafizə orqanlarına davamlı müraciət edirik və qanunla başqa səlahiyyətimiz yoxdur. “Uman yerdən küsərlər” fikrinizə sayğı ilə yanaşıram, amma bu kimi proseslərdə ancaq qanunla daşıdığımız səlahiyyət çərçivəsində hərəkət edə bilərik.