“Yas yerlərində zəhərlənmə halları sürətlə artır. Birincisi, yaslarda yemək verilməsinə – bu mədəniyyətsizliyə Azərbaycanda birmənalı şəkildə son qoyulmalıdır. Yas məclislərində üç kişinin bir anda öldüyünü görmüşəm. Bakır qazanda yemək bişiriblər. CuSO4 – bakır insanları zəhərləyib yerindəcə öldürüb. Kəfkirdə və ya qazanda bu maddə olur. Gəncədə baş verən ardıcıl zəhərlənmə hadisələri ilə bağlı Azərbaycan Qida Təhlükəsizliyi Agentliyinin apardığı araşdırmalar mütləq son nəticədə deyəcək ki, zəhərlənmə ev şəraitində hazırlanmış qidadan olub, yaxud hansısa çirklənmə baş verib. Nə qədər ki vəziyyət belədir, zəhərlənmələr davam edəcək. İctimai nəzarət, vətəndaşların fəallığı lazımdır. Problemlərlə üzləşdikdə 1003 qaynar xəttinə məlumat vermələrini tövsiyə edirəm”.

KONKRET.az xəbər verir ki, bu sözləri Pravda.az-a açıqlamasında Azad İstehlakçılar İctimai Birliyinin (AİİİB) sədri Eyyub Hüseynov deyib.

E.Hüseynov qeyd edib ki, 30 il ərzində Azad İstehlakçılar İctimai Birliyi bir dəfə də olsun zəhərlənməyə səbəb olan tərəfin məsuliyyətə cəlb edilməsinə nail ola bilməyib, çünki Azərbaycan həkimlərinin əlini kəssən də, yazmırlar ki, şəxs nədən zəhərlənib: “Bir dəfə belə kompensasiya verilməsinə nail olmamışıq. Adətən bu cür hallarda istehlakçı zəhərlənəndə səhiyyə orqanlarına gedir. Onlar istehlakçının mədəsini yuyurlar. Beləliklə, fakt itdi. Mədə yuyuldu, vəssalam. Ölkədə zəhərlənmələrin qeydiyyatı çox bərbad vəziyyətdir. Ümumdünya göstəricisindən yeddi yüz dəfə az göstərilir. Zəhərlənmələrin belə anormal qeydiyyatı, istehlakçı hüquqlarının öndə olmaması, yalnız və yalnız biznes inkişafı kimi ümumi səbəblər zəhərlənmələrin sayının artmasına gətirib çıxarır. Biznes qurmaq üçün nə istəyirlərsə, edirlər”.