ABŞ kəşfiyyatının yeni məlumatları İranın Yaxın Şərqdəki hədəflərə zərbə endirmək imkanlarına əvvəlkindən daha çox əmin olduğunu göstərir.

KONKRET.az xəbər verir ki, “The New York Times” qəzetinin mənbələrə istinadən yaydığı məlumata görə, kəşfiyyat orqanları Tehranın münaqişədə əhəmiyyətli dərəcədə eskalasiyaya gedə biləcəyini istisna etmir. ABŞ rəsmiləri hesab edirlər ki, İranın hərbi imkanları ilə bağlı artan inamı münaqişənin uzanmasına səbəb ola bilər.

Məlumata görə, bir neçə ABŞ rəsmisi mövcud şəraitdə münaqişəyə diplomatik yolla son qoyulmasının çətinləşdiyini bildirib. Onların fikrincə, Tehranla Vaşinqton arasında yeni razılaşmanın əldə olunması hazırkı mərhələdə az ehtimal olunur.

ABŞ rəsmiləri həmçinin xəbərdarlıq ediblər ki, İran yaxın həftələrdə Yaxın Şərqdəki ABŞ hərbi bazalarına qarşı hücumları artıra, eləcə də Hörmüz boğazında gəmiləri hədəfə ala bilər. Bu isə onsuz da gərgin olan regional vəziyyəti daha da ağırlaşdıracaq.

Kəşfiyyat qiymətləndirmələrinə görə, belə bir ssenari ABŞ Prezidenti Donald Tramp üçün daxili siyasi baxımdan da əlavə problemlər yaradacaq. Xüsusilə ABŞ-da keçiriləcək 2026-cı il ara seçkiləri ərəfəsində uzunmüddətli münaqişənin siyasi nəticələrinin Vaşinqton üçün ciddi risklər yaratdığı bildirilir.

Bu arada, ABŞ-İran qarşıdurmasında son günlər gərginlik yenidən yüksəlib. ABŞ ordusu İranın raket, hava hücumundan müdafiə və dəniz imkanlarına qarşı yeni zərbələr endirib, İran isə buna cavab olaraq regiondakı ABŞ obyektlərinə hücumlar həyata keçirib.

Günay Əli 

KONKRET.az