ABŞ hərbçiləri Sakit okeanın şərq hissəsində narkotik qaçaqmalçılığı ilə əlaqəli olduğu bildirilən bir neçə gəmini ələ keçirərək batırıblar.

KONKRET.az xəbər verir ki, bu barədə ABŞ Silahlı Qüvvələrinin Cənub Komandanlığı (SOUTHCOM) məlumat yayıb.

Komandanlığın 5 sentyabr tarixli açıqlamasına görə, ABŞ və Ekvadorun birgə əməkdaşlığı çərçivəsində həyata keçirilən əməliyyat zamanı beynəlxalq sularda narkotiklərin dəniz yolu ilə daşınmasına dəstək verdiyi bildirilən çoxsaylı gəmidən ibarət üzən yanacaq doldurma məntəqəsi müəyyən edilib.

ABŞ kəşfiyyatı gəmilərin Ekvadorun “Los Choneros” narkotik qruplaşmasının fəaliyyətinə dəstək verdiyini müəyyən edib.

Əməliyyatda iştirak edən ABŞ hərbçiləri əsas gəmiyə daxil olaraq onu yoxlayıblar. Gəmidəki şəxslər saxlanılaraq Ekvador hakimiyyətinə təhvil verilib.

Ekipaj gəmini tərk etdikdən sonra ABŞ qüvvələri əsas gəmini və ona bağlı köməkçi gəmiləri batırıb.

SOUTHCOM bildirib ki, əməliyyatın məqsədi narkotik qaçaqmalçılarının logistika şəbəkəsində mühüm həlqənin sıradan çıxarılması və regionda fəaliyyət göstərən cinayətkar qruplaşmaların imkanlarının zəiflədilməsidir.

Qeyd edək ki, bu, ABŞ qüvvələrinin son günlərdə “Los Choneros”la əlaqəli olduğu bildirilən gəmilərə qarşı həyata keçirdiyi ardıcıl əməliyyatlardan biridir. ABŞ Cənub Komandanlığı sentyabrın 2-si və 3-də də Sakit okeanın şərqində narkotik qaçaqmalçılığına dəstək verdiyi bildirilən gəmilərin ələ keçirildiyini və batırıldığını açıqlayıb.