Yeni asfalt örtüyü çəkilir, amma yolun üzərindəki xətlər bərpa olunmur. Hərəkət zolaqlarını ayıran xətlər, piyada keçidləri və stop-xətlər olmadan təhlükəsizlik necə təmin edilməlidir?
KONKRET.az xəbər verir ki, Baku TV asfaltlanmadan sonra yolun xətlənməməsi problemini gündəmə gətirib.
Söhbət yolun hərəkət hissəsinə çəkilən üfüqi nişanlanmadan gedir. Bu xətlər sürücülərə hərəkət zolaqlarını, dayanmalı olduqları yeri və piyadaların keçidini göstərir. Zəruri xətlərin olmaması hərəkətin təşkilini çətinləşdirə və təhlükəli vəziyyətlər yarada bilər.
Qanun nə tələb edir?
“Avtomobil yolları haqqında” Qanunun 40-2-ci maddəsi təmir zamanı yol hərəkəti iştirakçılarının təhlükəsizliyinin təmin olunmasını və hərəkətin düzgün təşkilini tələb edir. Həmin Qanunun 40-3-cü maddəsinə görə isə istifadədə olan yolun vəziyyəti yol hərəkətinin təhlükəsizliyini təmin etməlidir.
Üfüqi nişanlanmaya dair tələb Nazirlər Kabinetinin 7 fevral 2000-ci il tarixli 16 nömrəli qərarı ilə təsdiqlənmiş Qaydaların II bölməsinin 3.25-ci bəndində də göstərilib. Yol örtüyündə nişanlanma “Yol hərəkəti haqqında” Qanuna və qüvvədə olan normativ-texniki sənədlərə uyğun aparılmalıdır.
Xətlənmə sonraya saxlanıla bilərmi?
Həmin bölmənin 4.13-cü bəndi tikintisi tamamlanmış yolların istismara qəbuluna aiddir. Bu bəndə əsasən, iqlim şəraitinə görə hərəkət hissəsinin nişanlanması kimi işlər yalnız onların görülməməsi yolun təhlükəsiz istismarına mane olmadıqda sonraya saxlanıla bilər. İşlərin tamamlanma müddəti isə Dövlət Qəbul Komissiyasının aktında göstərilməlidir.
Deməli, bu istisna xətlənmənin qeyri-müəyyən müddətə təxirə salınmasına ümumi icazə vermir.
Bəs asfaltlanmadan sonra xətlər neçə günə çəkilməlidir?
İstinad edilən qanun maddələri və qərarın göstərilən bəndlərində bütün yollar üçün vahid gün sayı müəyyən olunmur. Bununla belə, nişanlama xətlərinə dair ayrıca AZS 943:2023 dövlət standartı da mövcuddur. Konkret yol üzrə müddətin qiymətləndirilməsi üçün tətbiq olunan texniki tələblər, layihə və işlərin icra sənədləri də nəzərə alınmalıdır.
Bu səbəbdən aidiyyəti qurumların cavablandırmalı olduğu suallar konkretdir: asfaltlanan yolda xətlənmə nə vaxt tamamlanacaq, bu tarix hansı normativ tələbə və sənədə əsaslanır, həmin vaxtadək sürücü və piyadaların təhlükəsizliyi necə təmin olunur?