Azərbaycanda yüksək maaşlı peşələr hər zaman maraq doğurub. Hər birimiz gələcək karyeramızı planlaşdırarkən hansı peşələrin daha çox maaş verdiyini bilmək istəyirik.
Bəs yüksək gəlir əldə etmək üçün hansı sahəyə yönəlməliyik? Hansı iş bizə yaxşı məvacib qazandıracaq? Lent.az-ın apardığı araşdırma göstərib ki, ölkədə eyni sahə üzrə müxtəlif maaşlı işlər təklif olunur.
Elan saytlarında ən yüksək maaş maliyyə sahəsində təklif olunur:
Maliyyə direktoru – 6 000 manat;
Baş mühasib – 4 500 manat;
Vergi direktoru – 4 500 – 6 000 manat.
Ən çox maraq olan satış sahəsində isə vəziyyət belədir:
Mağazanın bölgə müdiri – 2 500 – 3 000 manat;
Satış meneceri – 4 000 manat.
Mövzu ilə bağlı danışan iqtisadçı-ekspert Pərviz Heydərovun fikrincə, ölkədə ən çox maaş alan sahələr hasiledici sənayeyə aid olanlardır:
“Təbii ki, neft və qaz sektoru bu siyahının başında gəlir. Bundan əlavə maliyyə və rabitə sahəsində çalışan işçilərin də əməkhaqqıları digərlərinə nisbətən daha yüksəkdir. Tələbatın çox olduğu sahələrdə daha çox qazanc əldə etmək olar”.
Bəs statistika nə deyir?
Dövlət Statistika Komitəsindən verilən məlumata görə, 2024-cü ildə ən yüksək orta aylıq əməkhaqqı alanlar mədənçıxarma sənayesində çalışan işçilərdir.
İkinci yeri isə maliyyə və sığorta üzrə fəaliyyət göstərənlər tutur.
Bu ardıcıllığı elmi, texniki fəaliyyət, informasiya və rabitə, elektrik enerjisi, qaz və buxar istehsalı sahələri davam etdirir.
Dünyada vəziyyət necədir?
Bu gün dünyada öz biznesini qura bilən şəxslər, hakimlər, pilotlar, kompüter sahəsini mükəmməl bilənlər və hüquqşunaslar çox qazana bilirlər.
Ən çox gəlir gətirən 5 sahə:
1. CEO – Şirkət rəhbəri, öz biznesini quran şəxslər CEO adlanır. CEO dünyanın ən qazanclı sahələrindən biridir. Təxminən dünya üzrə illik gəliri 1 milyon dollara çatır, Azərbaycanda isə bu rəqəm CEO-nun yaratdığı şirkətdən asılı olaraq aylıq 1000-20.000 manat arası dəyişir. Təbii ki, bu uğurlu alınmış biznes sahiblərinin gəliridir.
2. Həkim –Həkim olmaq üçün ölkəmizdə dövlət və özəl xəstəxanalarda çalışmaq mümkündür. Özəl xəstəxanalarda həkimlərin orta aylıq maaşı 2000 manat civarındadır. Dövlət xəstəxanalarında isə dünyanın bütün ölkələrində özəl xəstəxanalarla müqayisədə maaş aşağıdır.
3. Pilotçuluq – dünyada ən çox gəlir gətirən sahələrdən biridir orta hesabla karyerasına yeni başlayan bir pilotun aldığı maaş aylıq 3 min dollar civarındadır.
4. Kompyuter mühəndisliyi – olduqca yeni və daim inkişaf edən bir ixtisasdır. Demək olar ki, istənilən özəl və dövlət müəssisəsində iş tapmaq mümkündür. Qazancı isə aylıq 1500 dollardan başlayır.
5. Vəkil – Hüquqşunas – Hüquq sahəsi də olduqca qazanclı bir sahədir. Təbii ki, söhbət yaxşı hüquqşünasdan gedirsə dünya təcrübəsində hüquqşünaslar özəl şirkətlərin və tanınmış şəxslərin özəl vəkili olaraq işləyirlər (bir neçə yerdə eyni anda işləmək olur), aylıq gəliri isə gördüyü işdən asılı olaraq 1000 dollardan başlayır.