İstanbul Beynəlxalq İxtira Sərgisinin qaliblərindən biri, həmyerlimiz Ceyhun Xəlilov haqqın.az saytında gedən yazının bir hissəsinə görə Hava Nəqliyyatından Baş Gömrük İdarəsindən üzr istəyib.

KONKRET.az xəbər verir ki, o, bunu özünün facebook səhifəsində edib.

Həmin statusu təqdim edirik:

“Əziz dostlar, məqalənin sonunda kiçik bir anlaşılmazlıq olub. Belə ki, məhz gömrük əməkdaşları mənə Türkiyəyə gedə bilməyim üçün sənədləşmənin tez aparılmasına köməklik ediblər. Anlaşılmazlığa görə şəxsən Hava Nəqliyyatında Baş Gömrük İdarəsinin əməkdaşlarından üzrxahlıq edirəm və qısa zamanda düzəlişin olması üçün gərəkəni edəcəm”.

Qeyd edək ki, həmin saytda bildirilirdi ki, gömrük məmurları ixtiraçını iki gün hava limanında saxlayıblar.

Yeri gəlmişkən, həmyerlimizin ixtira etdiyi cihaz 16 metrə qədər dərinlikdə dağıntılarda insan olub-olmadığını müəyyən edə bilir. Məhz Xəlilovun aparatı sayəsində Türkiyədə dağıntılar altından on dörd nəfər aşkar edilərək xilas edilib.