İyunun 28-də Kərəc İnqilab Məhkəməsinin ikinci bölməsində barəmdə açılan yeni iş üzrə keçirilməsi nəzərdə tutulan sifarişli məhkəmə iclasında iştirak etməyəcəyəm.
KONKRET.az xəbər verir ki, bunu hazırda Kərəcin mərkəzi həbsxanasında saxlanılan azərbaycanlı müəllim və ictimai fəal Məsud Fərhihxtə deyib.
O, ailəsi ilə telefon danışığı zamanı həbsdə olduğu müddətdə ona qarşı qaldırılan işlərə toxunaraq vurğulayıb:
“Həbsxana tələblərin sonu deyil, əksinə, zülmkar rejimin zülmünə qarşı durmağın növbəti başlanğıcıdır”.
O, həmçinin dörd dəfə təkadamlıq kamerada saxlanıldığını, təxminən beş ay ailəsi ilə görüşməkdən məhrum edildiyini və Kərəc məhkəməsinin istintaq şöbələrində barəsində iki yeni işin qaldırıldığını bildirib.
Məhbus müəllim bundan sonra İslam Respublikasının ədalətsiz, sifarişli və formal məhkəmələrinin heç bir qapalı keçirilən iclaslarına qatılmayacağını deyib.
Qeyd edək ki, Albürz əyalətinin İslamşəhr şəhərində yaşayan müəllim və ictimai fəal Məsud Fərhihxtə ötən ilin avqust ayında 4 il 1 ay 17 gün həbs cəzasına məhkum edilib.
O, “ölkənin milli təhlükəsizliyinə qarşı toplaşmaq və əlbir olmaq” və “hökumətə qarşı təbliğat”da günahlandırılıb.