ABŞ-ın Texas sahillərinə çatan Beril qasırğası nəticəsində 1 milyondan çox ev işıqsız qalıb.
KONKRET.az xəbər verir ki, ABŞ-ın Texas ştatının Hyuston şəhərində güclü külək və yağışlar nəticəsində bölgədəki küçələri su basıb.
ABŞ Milli Meteoroloji Xidməti Karib hövzəsinə təsir edən və “1-ci kateqoriya” intensivliyi ilə Texas sahillərinə çatan Beril qasırğasının “tropik depressiya” səviyyəsinə (sürəti 60-a qədər olan kateqoriya) düşə biləcəyini açıqlayıb.
Uçuşların gedişatını izləyən FlightAware saytının məlumatına görə, Hyustondakı iki hava limanında 1000-dən çox reys ləğv edilib.
Texas sahillərində yaşayan vətəndaşlar evlərinin və iş yerlərinin pəncərələrini lövhələrlə örtərək qasırğaya qarşı tədbir görüblər. Təxliyə əmrindən sonra sahilyanı qəsəbələrin sakinləri də öz yerlərini tərk etməyə başlayıblar.
Qasırğanın təsirli olduğu Qrenada adasında bir nəfər, Venesuelada isə 3 nəfər ölüb.
Rəsmiyyə Şərifova,
KONRET.az
