Bakıda avronun rəsmi məzənnəsi yüksəlib. Azərbaycan Mərkəzi Bankının açıqladığı göstəriciyə əsasən, 1 avro 1,9672 manat təşkil edib. Bu isə avronun bahalaşacağı təqdirdə idxal olunan məhsulların qiymətinin dəyişib-dəyişməyəcəyi sual doğurur.

KONKRET.az xəbər verir ki, mövzu ilə bağlı Pravda.az-a açıqlama verən iqtisadçı Rəşad Həsənov bildirib ki, avronun məzənnəsinin güclənməsinin hazırda bazarda qiymətlərə ciddi təsirlərindən danışmaq erkəndir.

O qeyd edib ki, son bir il ərzində avronun məzənnəsi təxminən 4-5 faizlik diapazonda özünü əks etdirib, son bir ayda avro 1,7-2 faiz ətrafında öz dəyərini artırıb: “Bu davamlı xarakter aldığı halda, əlbəttə, qiymətlərə müəyyən qədər təsiri ola bilər. Artım istiqamətli təsirləri yarana bilər. Çünki Avropa Birliyi ilə Azərbaycan arasında təxminən il ərzində 4-4,5 milyard manat dəyərində idxal münasibətləri var. Burada həm tibbi ləvazimatları, həmçinin məişət texnikası, onun hissələri, avtomobil ehtiyat hissələri, geyim, kosmetik vasitələr, içkilər və s. istiqamətində qiymət artımı meyllərinin baş verməsi mümkündür. Ən azından bu istiqamətdə təzyiqlər formalaşır. Amma nəzərə almaq lazımdır ki, qiymətlərin bazarda formalaşmasına təsir edən kifayət qədər faktorlar vardır. Hazırda əhalinin alıcılıq gücü qiymət artımları istiqamətində təzyiqləri qarşılayacaq səviyyədə deyil. Eyni zamanda şirkətlərin qiymət siyasəti və digər məsələləri nəzərə almaq lazımdır. Əvəzedicisi olmayan və ya qiymət elastikliyi zəif olan məhsul növlərində qiymət artımlarını müşahidə edə bilərik. Amma digər qiymət elastikliyi yüksək olan məhsul növlərində indiki şərtlər daxilində düşünürəm ki, qısamüddətli dövrdə ciddi qiymət artımlarını görməyəcəyik”.