Ermənistan Kollektiv Təhlükəsizlik Müqaviləsi Təşkilatında (KTMT) aktiv fəaliyyəti bərpa etmək üçün addımlar atmayacaq.
KONKRET.az Armenpress-ə istinadla xəbər verir ki, bunu Ermənistanın Baş naziri Nikol Paşinyan hakim “Vətəndaş müqaviləsi” Partiyasının seçki platformasına daxil olan çoxtərəfli formatlarda əməkdaşlıq haqqında müddəaları təqdim edərkən bildirib.
“Bildiyiniz kimi, Ermənistan Respublikasının KTMT-dəki üzvlüyü dondurulub və fəaliyyəti bərpa etmək üçün heç bir addım atılmayacaq. Bu, seçki platformamızda da qeyd olunub”, – deyə Paşinyan vurğulayıb.
Ermənistanın digər çoxtərəfli formatlarda iştirakından danışan Paşinyan qeyd edib ki, Ermənistanın çoxtərəfli formatlarda iştirakı balanslı və ədalətli xarici siyasətin effektivliyini artırmaq üçün vacibdir:
“Ermənistan Respublikası BMT-nin və onun ixtisaslaşmış qurumlarının, Avropa Şurasının, ATƏT-in, MDB-nin, Beynəlxalq Frankofoniya Təşkilatının və Avropa Siyasi Birliyinin fəal üzvü olmağa davam edəcək. Ermənistan Respublikası həmçinin ABŞ Prezidenti Donald Trampın təşəbbüsü ilə yaradılmış Sülh Şurasının üzvü olub və bu formatda işini davam etdirəcək”.
Baş nazir xatırladıb ki, 2026-cı ilin oktyabr ayından etibarən Ermənistan Respublikası BMT-nin Bioloji Müxtəliflik üzrə Konvensiyasının 17-ci Tərəflər Konfransına (COP-17) sədrlik edəcək və təxminən iki il ərzində ətraf mühitin qorunmasına yönəlmiş qlobal qərar qəbuletmədə mərkəzi rol oynayacaq. Bu, Ermənistana həm ətraf mühit, həm də beynəlxalq səviyyədə özünü daha yaxşı mövqe tutmaq üçün əhəmiyyətli imkanlar yaradacaq.
“Biz həmçinin Şanxay Əməkdaşlıq Təşkilatına üzvlükdə maraqlıyıq. Balanslı və ədalətli xarici siyasət kontekstində Ermənistan digər çoxtərəfli formatlarda iştirakını və ya əməkdaşlığını nəzərdən keçirəcək”, – deyə Ermənistan Respublikasının Baş naziri qeyd edib.
Ermənistan 2024-cü ilin fevral ayında KTMT-dəki iştirakını dayandırıb. Ermənistanın Baş naziri Nikol Paşinyan bunu “France 24″ə verdiyi müsahibədə bildirib və KTMT-nin Ermənistan qarşısında təhlükəsizlik öhdəliklərini yerinə yetirmədiyini vurğulayıb.