Böyük Britaniya və Şimali İrlandiya Birləşmiş Krallığının Kralı III Çarlz ABŞ-a dövlət səfərləri zamanı müxtəlif illərdə üç prezidentlə görüşüb.

KONKRET.az xəbər verir ki, III Çarlz ABŞ-a iki dəfə Uels şahzadəsi statusunda, bir dəfə isə kral kimi səfər edib.

O, ilk dəfə 1970-ci ildə Ağ Evdə ABŞ Prezidenti Riçard Niksonla görüşüb. Həmin vaxt Çarlz hələ Uels şahzadəsi idi.

İkinci görüş 2015-ci ildə baş tutub. O zaman Çarlz Oval kabinetdə ABŞ Prezidenti Barak Obama ilə görüşmüşdü.

Hazırda isə Kral III Çarlz ABŞ-da dörd günlük səfərdədir və artıq Prezident Donald Trampla görüşüb.

Bu üç görüşün görüntüləri təkcə Britaniya monarxının siyasi və diplomatik tarixdəki uzun yolunu deyil, həm də Ağ Evin ən məşhur məkanlarından biri olan Oval kabinetin illər ərzində necə dəyişdiyini göstərir.

1970-ci ilin kadrlarında Oval kabinet daha klassik və sadə görünüşü ilə seçilirdi. 2015-ci ildə Obama dövründə otaqda daha müasir, işıqlı və funksional üslub diqqət çəkirdi.

Tramp dövründə isə Oval kabinet daha təntənəli və nümayişkaranə dekorasiya ilə yadda qalır. Qızılı detallar, parlaq elementlər və simvolik aksessuarlar otağın ümumi atmosferini daha dəbdəbəli göstərir.

Beləliklə, III Çarlzın üç ayrı dövrdə ABŞ prezidentləri ilə görüşləri həm Britaniya-Amerika münasibətlərinin davamlılığını, həm də Vaşinqtonun siyasi üslubunun zamanla dəyişməsini əks etdirir.

Ağagül Mürsəlov,

KONKRET.az