Burada 11 ölkədən 60 aparıcı mütəxəssis iştirak edəcək.

KONKRET.az-ın Orta Asiya ölkələri üzrə bürosuna Valday klubunun mətbuat xidmətinin rəhbəri Olqa Qolovanova məlumat verib ki, noyabrın 10-11-də Səmərqənddə klubunun 10-cu Asiya Konfransı keçiriləcək, konfransda 11 ölkədən 60 aparıcı mütəxəssis bir araya gələcək.

Konfransda özbək ekspertləri ilə yanaşı, Rusiya, Qazaxıstan, Qırğızıstan, Tacikistan, Almaniya, İsveç, Yaponiya, Hindistan, Filippin və Çin mütəxəssisləri iştirak edəcəklər. Klub ilk dəfə məkan olaraq Özbəkistanı seçib. Bu, Orta Asiya dövlətləri arasındakı münasibətləri kökündən dəyişdirən Prezident Şavkat Mirziyoyevin yeni kursu ilə əlaqədardır.

“Gələcək konfransın əsas diqqət mərkəzi məhz bu bölgədir – Böyük Avrasiyanın maddi-texniki, mədəni, sivilizasiya və iqtisadi mərkəzi olan bölgə geniş beynəlxalq birliyə inteqrasiya potensialına malikdir. Mərkəzi Asiya ölkələri regionun əsas (Rusiya, Çin, Hindistan) və qeyri-əsas (ABŞ, Avropa Birliyi) ölkələri ilə geniş qarşılıqlı əlaqə qururlar. Bu faktlar geosiyasət nöqteyi-nəzərindən şübhəsiz maraq doğurur”, – deyə Olqa Qolovanova şərh verib.

Konfransın proqramına “Rusiya – Özbəkistan” ikitərəfli sessiyası və xarici mütəxəssislərin iştirakı ilə iclaslar daxildir. Tədbirin əsas mövzuları bölgənin dünya məsələlərindəki rolu, təhlükəsizlik problemləri, gələcəyə yanaşmalar və iqtisadiyyat vasitəsilə birgə qarşılıqlı fəaliyyət olacaqdır.

Qeyd etmək lazımdır ki, bu il Valday Klubunun tədbirində Qərb nümayəndələri də iştirak edəcəklər. Özbəkistanı konfransda Prezident yanında Təhlükəsizlik Şurasının katibi Viktor Mahmudov, Ali Məclisin Senatının beynəlxalq münasibətlər, xarici iqtisadi əlaqələr, xarici investisiya və turizm komitəsinin sədri Əlişir Kurmanov, Demokratik təsisatlar, qeyri-hökumət təşkilatları və vətəndaşların özünüidarəetmə komitəsinin sədri Akmal Saidov təmsil edəcəklər.