Fransanın yüksək sürətli qatar şəbəkəsinə bir sıra koordinasiyalı hücumlar həyata keçirilib.

KONKRET.az xəbər verir ki, Paris Olimpiadasının açılış mərasimi ərəfəsində ölkənin ən işlək qatar xətlərinin bəzilərində böyük fasilələr yaranıb.

Dövlət dəmir yolu operatoru bildirib ki, yanğın törədənlər şimalda Parisi Lill, qərbdə Bordo və şərqdə Strasburqla birləşdirən xətlər boyunca xətləri hədəf alıblar. Təmir işləri gedir, lakin ən azı həftəsonunun sonuna qədər nəqliyyatın hərəkəti ciddi şəkildə pozulacaq.

Fransız Dəmir Yolları Milli İcmasının (SNCF) bəyanatında deyilir: “Yanğınlar obyektlərimizə ziyan vurmaq qəsdi ilə başlayıb”.

Fransa 45 mindən çox polis, 10 min əsgər və 2 min özəl mühafizəçi ilə Olimpiada zamanı görünməmiş təhlükəsizlik tədbirləri görür. Snayperlər evlərin damında olacaq, pilotsuz təyyarələr isə havadan müşahidə aparacaq.

Qeyd edək ki, 2024-cü il Olimpiadasının açılış mərasiminin iyulun 26-da Parisdə keçirilməsi planlaşdırılır. Olimpiada bütün dünyada görünməmiş maraq və həyəcan doğurub. Belə ki, 1996-cı ildə Atlanta rekordu qırılıb, Oyunların başlamasından xeyli əvvəl 10 milyon bilet satılıb. Yarışı şəxsən izləmək imkanı 24 avrodan (ümumi biletlərin cəmi 10%-i) 2700 avroya qədərdir. Bundan əlavə, Olimpiada tarixində ilk dəfə olaraq bütün biletlər onlayn satılıb.

Rəsmiyyə Şərifova,

KONKRET.az