Ermənistanın Avropa İttifaqına (Aİ) üzvlüyü prosesində ölkədən Rusiyaya qarşı sanksiyalara qoşulması və ruslar üçün viza rejimi tətbiqi tələb edilə bilər.

KONKRET.az xəbər verir ki, bu barədə Avropa Parlamentinin deputatı Fernan Kartheyzer “İzvestiya” nəşrinə müsahibəsində bildirib.

Onun sözlərinə görə, Brüssel İrəvana Avropa inteqrasiyası vədi verməklə əsasən Ermənistanın Moskva ilə əlaqələrini zəiflətməyə çalışır.

Deputat qeyd edib ki, Avropa rəsmiləri Ermənistana Rusiya ilə viza rejimi tətbiq etmək və Moskvaya qarşı sanksiyalara qoşulmaq istiqamətində ciddi təzyiq göstərə bilərlər.

Kartheyzer hesab edir ki, Avropa İttifaqı Ermənistandan öz geosiyasi maraqları naminə istifadə edir və belə addımların iqtisadi və siyasi nəticələrindən ölkəni qoruya bilməyəcək.
Avroparlamentari əlavə edib ki, Ermənistan Qərblə əməkdaşlığını uzunmüddətli layihə kimi qiymətləndirməli, eyni zamanda regionda vəziyyəti daha da gərginləşdirəcək və ya ölkənin mövqeyini zəiflədəcək addımlardan çəkinməlidir.

“Ermənistana bu tədbirləri qəbul etməsi üçün ciddi təzyiq göstəriləcək. Ümid edirəm ki, Ermənistan bu təzyiqə tab gətirəcək və ilk növbədə öz milli maraqlarını rəhbər tutacaq”, – deyə o, bildirib.

Müşviq Tofiqoğlu
KONKRET.az