KONKRET.az-ın Mərkəzi Asiya ölkələri üzrə bürosu xəbər verir ki, Qırğızıstanın Cəlalabad vilayətinin Ala-Buka rayonu, Kok-Taş kəndi yaxınlığında Özbəkistan hərbiçilərinin iştirakı ilə insident qeydə alınıb.

İki qırğızın dövlət sərhədinin şərti xətti yaxınlığında mal-qara otladığı məlum olub. Özbəkistan hərbiçiləri mal-qaranı dağıtmağa başlayıb. Yaranan insidenti eşitdikdən sonra digər kənd sakinləri hadisə yerinə gəlib. Kənd sakinləri ilə özbək sərhədçiləri arasında qarşıdurma olub. Özbək hərbiçiləri havaya xəbərdarlıq atəşləri açıblar.

Çon-Sai kəndinin başçısı Oskon Rustomov hadisəni təsdiqləyib. Münaqişənin həlli üçün xırda mal-qaranın qaytarılması məsələsi də daxil olmaqla, iki ölkənin sərhəd nümayəndələrinin görüşü keçirilir.

Qeyd edək ki, Kok-Taş Özbəkistanın Namanqan vilayətinin Çust və Pap rayonları ilə həmsərhəddir.

Rəsmi məlumatlara görə, Qırğızıstanın Cəlalabad vilayətinin Ala-Bukinski rayonunda dövlət sərhədinin qeyd olunmamış dörd hissəsi var.