Alimlər bioloji qocalma prosesinin qarşısını almaq və sağlam ömrü uzatmaq üçün yeni potensial üsul müəyyən ediblər.

KONKRET.az xəbər verir ki, “Nature Aging” jurnalında dərc olunan araşdırmada bağırsaq mikrobiomunda yaşayan Bifidobacterium pseudocatenulatum bakteriyasının yaş artdıqca əhəmiyyətli dərəcədə azaldığı müəyyən edilib.

Tədqiqatçılar müxtəlif insan qruplarının bağırsaq mikrobiomunu araşdıraraq bu bakteriyanı qocalmaya qarşı qoruyucu potensiala malik mikroorqanizm kimi müəyyənləşdiriblər.

Araşdırmanın əsas hissəsi yaşlı siçanlar üzərində aparılıb. Heyvanlara Bifidobacterium pseudocatenulatum verildikdən sonra bağırsaq fəaliyyətində yaxşılaşma, müxtəlif orqanlarda yaşlanma ilə əlaqəli iltihabın azalması, həmçinin yaddaş və hərəkət qabiliyyətinin yaxşılaşması müşahidə olunub.

Alimlər bakteriyanın istehsal etdiyi 5-AVAB adlı metaboliti də araşdırıblar. Bu maddənin səviyyəsinin insanlarda yaş artdıqca azaldığı müəyyən edilib. Siçanlara 5-AVAB verildikdə də yaşlanma ilə bağlı iltihabın azalması və koqnitiv-motor funksiyaların yaxşılaşması müşahidə olunub.

Tədqiqat müəllifləri Bifidobacterium pseudocatenulatum və 5-AVAB arasında əlaqənin gələcəkdə sağlam qocalmanı dəstəkləyən mikrobiom əsaslı müalicələrin hazırlanması üçün perspektivli istiqamət ola biləcəyini bildirirlər.

Günay Əli 

KONKRET.az