Rusiya hökuməti istehsalçılar tərəfindən dizel yanacağının ixracına tətbiq edilən qadağanı 2026-cı ilin oktyabr ayının sonuna qədər uzatmaq qərarına gəlib.

KONKRET.az rus mediasına istinadən xəbər verir ki, bu barədə Baş nazirin müavini Aleksandr Novakla sentyabrın 14-də keçirilən görüşün nəticələri ilə tanış olan iki mənbə məlumat verib.

İstehsalçılar üçün ixrac qadağası iyulun əvvəlindən qüvvədədir. Məhdudiyyət əvvəlcə iyulun 31-dək tətbiq edilib, daha sonra sentyabrın 1-dək, son olaraq isə sentyabrın 30-dək uzadılıb. İllik istehsal gücü 1 milyon tona qədər olan treyderlər və kiçik neft emalı zavodları üçün tətbiq edilən məhdudiyyət isə 2025-ci ilin sentyabrından qüvvədədir və artıq 2027-ci il yanvarın 31-dək uzadılıb.

Nəşrin mənbələrindən biri qadağanın uzadılmasının əsas səbəbinin daxili bazarın yanacaqla təminatını qorumaq olduğunu bildirib. Ekspertlər isə qərarı neft emalı zavodlarında planlaşdırılan təmir işlərinin payız aylarına təxirə salınması və daxili bazarda yanacaq ehtiyatlarının artırılması zərurəti ilə əlaqələndirirlər.

Xatırladaq ki, Rusiya Baş nazirinin müavini Aleksandr Novak iyul ayında yanacaq-enerji infrastrukturuna endirilən zərbələrin bir sıra neft emalı zavodlarının fəaliyyətinə təsir etdiyini açıqlamışdı. Onun sözlərinə görə, bunun nəticəsində benzin və dizel yanacağı istehsalı müvəqqəti olaraq azalıb.

Sentyabrın 15-də “Reuters” Rusiyanın iri dizel istehsalçısı olan neft emalı zavodlarının təxminən yarısının sentyabr ayında istehsalı azaltdığını yazıb. Bundan əvvəl, sentyabrın 13-də ABŞ Prezidenti Donald Tramp Ukraynanı Rusiyanın dizel istehsalına yönəlmiş zərbələri dayandırmağa çağırmışdı. Tramp bu cür hücumların qlobal yanacaq bazarına mənfi təsir göstərə biləcəyini bildirib.

Daha sonra Rusiya və Ukrayna arasında enerji obyektlərinə zərbələrin dayandırılması ilə bağlı müzakirələr gündəmə gəlib. Bununla belə, tərəflərin enerji infrastrukturuna qarşı hücumlarla bağlı qarşılıqlı ittihamları davam edir. Beləliklə, Rusiyanın dizel yanacağı ixracına tətbiq etdiyi məhdudiyyətlərin uzadılması ölkə daxilində yanacaq təminatının sabit saxlanılması və ehtiyatların artırılması məqsədi daşıyır. Eyni zamanda, neft emalı zavodlarında istehsalın azalması və enerji infrastrukturuna qarşı hücumlar yanacaq bazarında vəziyyəti daha da həssaslaşdırır.

Rəsmiyyə Şərifova,

KONKRET.az