“Rus qoşunları Xarkov uğrunda döyüşdə məğlub oldular. Lakin ruslar Xarkov vilayətindən keçərək Ukraynanın dərinliklərinə getməyə çalışırlar”.

KONKRET.az UNİAN-a istinadən xəbər verir ki, bu barədə Xarkov vilayət hərbi administrasiyasının sədri Oleq Sinequbov telemarafonun efirində bildirib.

“Düşmən Xarkov uğrunda döyüşdə məğlub oldu. Rusların tutduğumuz mövqelərimizə hücumu son dərəcə çətin olacaq. Onların bir istiqaməti qalıb – Kupyansk, İzyum vasitəsilə, Donetsk və Luqansk vilayətlərinə qoşun yeritmək, bu istiqamətdə hərbi mövcudluğunu artırmaq”, – Sinequbov bildirib.

Eyni zamanda o vurğulayıb ki, Ukrayna Silahlı Qüvvələri bu istiqamətdə müdafiəni etibarlı şəkildə saxlayır. Şiddətli döyüşlər isə davam edir. Düşmən orada hər gün çoxlu sayda canlı qüvvə, təyyarə və zirehli texnika itirir. O xatırladıb ki, dünən Rusiya təyyarəsi Balakliya istiqamətində vurulub.

Ukraynalı müdafiəçilər Xarkov vilayətində kəndləri fəal şəkildə azad edirlər, lakin sakinlərin evə qayıtması hələ də təhlükəlidir.

“Orada təhlükəsiz olduğunu söyləmək hələ tezdir. Döyüş bu dəqiqələrdə də davam edir”, – Sinequbov xəbərdarlıq edib.

Rəsmiyyə Şərifova,

KONKRET.az