ABŞ Prezidenti Donald Tramp İrana zərbələrin endirilməsi barədə əmri Türkiyədə olarkən verib.

KONKRET.az xəbər verir ki, bu barədə “Axios” portalının jurnalisti Barak Ravid Ağ Ev administrasiyasındakı mənbələrə istinadən “X”də məlumat yayıb.

Onun sözlərinə görə, ABŞ lideri NATO sammitində iştirak etmək üçün səfər etdiyi Ankarada olarkən İrana zərbə endirmək planını təsdiqləyib və bununla bağlı əmr verib.

Bildirilir ki, Ağ Ev rəhbəri qərar qəbul etməzdən əvvəl Ankarada ABŞ Dövlət katibi Marko Rubio, Pentaqon rəhbəri Pit Heqset, maliyyə naziri Skott Bessent və ABŞ Silahlı Qüvvələrinin Baş Qərargah Rəisləri Komitəsinin sədri general Den Keyn ilə müşavirə keçirib.

Qeyd edək ki, dünən gecə saatlarında Hörmüz boğazı yaxınlığında Qətərə məxsus “Ər-Rukeyyat” adlı neft tankeri vurulub. İran tərəfi neft tankerini xəbərdarlıqlara əməl etmədiyinə görə vurduğunu açıqlayıb. Bundan sonra ABŞ İran ərazisinə zərbələr endirib. İran İnqilab Keşikçiləri Korpusu (SEPAH) isə ABŞ-nin Bəhreyn və Küveytdə yerləşən 85 hərbi obyektinə raket və pilotsuz uçuş aparatları ilə zərbələr endirdiyini açıqlayıb.