“Bildiyiniz kimi, ötən gündən başlayaraq Ukrayna ərazilərində hərbi-siyasi vəziyyət gərginləşib. Ölkənin bir çox istiqamətlərində hərbi əməliyyatlar gedir. Ukraynanın Xarkov şəhəri ölkənin ikinci şəhəri olması ilə döyüşlərin getdiyi əsas ərazilərə yaxındır. Buna baxmayaraq Azərbaycan konsulluğu ştat rejimində fəaliyyətini davam etdirir və həmvətənlərimizə imkanları daxilində müxtəlif köməklikləri göstərməkdədir”.

KONKRET.az xəbər verir ki, bunu Azərbaycanın Ukraynanın Xarkov şəhərində fəxri konsulu Əfqan Salmanov deyib.

O bildirib ki, konsulluq orada yaşayan azərbaycanlıların sayını müəyylənşdirməkdə davam edir: “Hazırda konsulluq əməkdaşları müxtəlif kanallarla konsulluğun xidməti dairəsində yaşayan həmvətənlərin sayının dəqiqləşdirməsi prosessi ilə məşğuldur. Operativ qaydada konsulluq Kiyev şəhərində fəaliyyət göstərən Azərbaycan konsulluğu və Xarici İşlər Nazirliyi ilə mütəmadi məsləhətləşmələr həyata keçirir.

Bir daha qeyd etmək istərdim ki, xüsusi hallar ilə bağlı vətəndaşlarımız Xarkov şəhərindəki fəxri konsulluğu ilə (+38057) 7000531 telefon xətti və [email protected] elektron poçt ünvanı ilə məlumat əldə edə bilərlər. Vəziyyətin inkişafından asılı olaraq əlavə məlumat tərəfimizdən bildiriləcək”.