Aleksandr Xodakovski şəxsi mikrobloqunda Ukraynanın Donbasa hücum etmək ehtimalından bəhs edib. “Vostok” batalyonunun qurucusu Qarabağ müharibəsinin nəticələrini əsas gətirərək qondarma respublika rəhbərliyini xəbərdarlıq edib.

Ukraynada müxtəlif siyasətçilər dəfələrlə “Xalq Respublikaları”na qarşı Xorvatiya senarisinin təkrarlanması barədə danışırdılar. İndi Donbasa hücumun nəticələr verə biləcəyini göstərən daha yaxın bir nümunə ortaya çıxdı – Dağlıq Qarabağ senarisi. Aleksandr Xodakovski hesab edir ki, Azərbaycanın ərazi bütövlüyü uğrunda apardığı müharibədəki qəti qələbəsi Ukraynanı həvəsə gətirib.

O, hadisələrin bu senari üzrə inkişafına şübhə etmir və bildirir ki, bu, separatçı qurum üçün ərazilərin itirilməsi ilə nəticələnə bilər. “DXR”-in Təhlükəsizlik Şurasının keçmiş rəhbəri Rusiyanın köməyinə ümid bəsləyənlərə Moskvanın hərbi eskalasiya vəziyyətində kömək edəcəyini xatırlatsa da, vurğulayıb ki, döyüşlərin mənfi nəticələnmə ehtimalı yüksəkdir. Bu, baş verə bilər, çünki Donbasdakı rəhbərlikdə hərbçi yoxdur. Müdafiə komitəsini canlandırmaq üçün təkliflər hələ anlayışla qarşılanmayıb.