Daha yüksək təhsil haqqı müəyyən edən özəl bağçaların maliyyələşməsi müsabiqəsindən keçməsi ehtimalı daha aşağı olacaq.

KONKRET.az report-a istinadən xəbər verir ki, bunu Məktəbəqədər və Ümumi Təhsil üzrə Dövlət Agentliyinin (MÜTDA) direktor müavini Vəfa Yaqublu jurnalistlərə açıqlamasında deyib.

O bildirib ki, qiymətləndirmə zamanı əsas meyarlardan biri müəssisənin maliyyə səmərəliliyidir:

“Bu meyar yüksək bal çəkisinə malikdir və müəssisənin standart xidmətləri hansı məbləğə təklif etməsi nəzərə alınacaq. Buna görə də həddindən artıq yüksək təhsil haqqı müəyyən edən müəssisələrin qalib olmaq ehtimalı daha aşağı olacaq. Valideynlərə də elanları diqqətlə izləmələri və qaliblər açıqlandıqdan sonra özlərinə uyğun müəssisələri seçmələri tövsiyə olunub”.

V.Yaqublu qeyd edib ki, yeni maliyyələşmə modeli dövlət dəstəyi hesabına daha çox uşağın məktəbəqədər təhsilə cəlb olunmasına imkan yaradacaq:

“Məktəbəqədər təhsil icbari olmadığı üçün valideynlər bəzən uşaqlarını müəyyən müddətdən sonra bağçadan çıxarırlar. Bu səbəbdən maliyyələşmə illik deyil, aylıq əsasda həyata keçiriləcək. Uşaqların davamiyyəti mütəmadi monitorinq olunacaq və dövlət öz üzərinə düşən maliyyə payını hər ay ödəyəcək. Valideynlər də təhsil haqqını aylıq qaydada ödəməyə davam edəcəklər. Müqavilələr 10 aylıq dövrü əhatə edəcək. Yay aylarında valideynlərin məzuniyyətə çıxması və mövsümi səbəblərlə uşaqların bağçalara davamiyyətinin azalması nəzərə alınaraq bu müddət müəyyənləşdirilib”.

MÜTDA rəsmisi xatırladıb ki, bu il maliyyələşmə modeli çərçivəsində 8 000 uşağın məktəbəqədər təhsilə cəlb olunması nəzərdə tutulur:

“Uşaq başqa bağçaya keçərsə, yeni namizəd kimi qiymətləndiriləcək və həmin boş yerlər də müsabiqəyə çıxarılacaq. Hazırda 170-dən çox özəl məktəbəqədər təhsil müəssisəsi fəaliyyət göstərir. Bu il isə daha 10 yeni müəssisə qeydiyyatdan keçib”.