“Kreml danışıqlara hazırdır”.

KONKRET.az xəbər verir ki, bunu Almaniyanın keçmiş kansleri Gerxard Şröder deyib. O bildirib ki, Rusiya Prezidenti Vladimir Putin Ukraynadakı müharibənin danışıqlar və diplomatik yolla həllini istəyir. Alman siyasətçi Kreml rəhbəri ilə mehriban münasibətdədir.

Şröder Moskvaya getdiyini və orada Rusiya Federasiyasının rəhbəri ilə görüşdüyünü bildirib.

“Yaxşı xəbər odur ki, Kreml danışıqlar vasitəsi ilə həll yolunu istəyir”, -deyə Şröder bildirib.

“Birinci uğur taxılla bağlı sövdələşmədir, bəlkə də onu atəşkəsə qədər genişləndirmək olar”,- deyə o əlavə edib.

Bundan başqa, Şröder bir sıra mübahisəli açıqlamalar verib.

O, müharibəni Rusiya hökumətinin səhvi adlandırıb. Sonra isə əlavə edib:

“Əgər həqiqətən aktual olan problemlərə baxsanız, onları həll etmək olar. Məsələn, Ukraynanın Krımı hərbi yolla geri alması absurddur.

Şröder Donbasın İsveçrə kantonu kimi görünməsini də təklif edib.

Xuraman Etibarlı,

KONKRET.az