Bu forum SPECA regionu üçün şəhərlərarası əməkdaşlığa həsr olunmuş ilk platformadır.

KONKRET.az apa-ya istinadən xəbər verir ki, bunu Azərbaycan Respublikası Dövlət Şəhərsalma və Arxitektura Komitəsinin sədri, WUF13 üzrə Milli Koordinator Anar Quliyev WUF13 çərçivəsində keçirilən “Şəhərlərin xüsusi forumu: İnklüziv və davamlı şəhər gələcəyi üçün mənzil həlləri” adlı forumda bildirib.

O bildirib ki, Forum Almatı, Arkadağ, Bişkek, Düşənbə, Gəncə və Səmərqənd olmaqla altı şəhər tərəfindən təsis edilib: “Bu şəhərləri birləşdirən əsas inam ondan ibarətdir ki, şəhərlər arasında əməkdaşlıq fərdi şəkildə əldə olunması mümkün olmayan nəticələr yarada bilər.

Bu sessiya xüsusi əhəmiyyət daşıyır, çünki o, SPECA Şəhərlər Forumunun rəsmi açılışını ifadə edir. Təşəbbüs şəhərlərimizin üzləşdiyi çağırışların daha güclü regional əməkdaşlıq, praktiki tərəfdaşlıqlar və yerli, həmçinin milli hakimiyyət orqanları arasında davamlı dialoq tələb etdiyinə dair ortaq anlayışı əks etdirir. Bu gün də həmin prinsip bizim şəhər gündəliyimizə istiqamət verir. Müasir şəhərlər artıq yalnız iqtisadi fəaliyyət və əhali artımının mərkəzləri deyil. Onlar eyni zamanda iqlim dayanıqlılığı, enerji səmərəliliyi, rəqəmsal transformasiya, sosial inklüzivlik və dayanıqlı şəhər idarəçiliyi sahələrində əsas rol oynayır”.

O bildirib ki, SPECA regionunda şəhərlər dərin urbanizasiya prosesləri, əhali artımı və iqtisadi transformasiya ilə müşayiət olunan ciddi şəhər dəyişiklikləri yaşayır: “Bu forum açıq və inkişaf edən platforma kimi nəzərdə tutulub və biz region üzrə əlavə şəhərləri və tərəfdaşları bu təşəbbüsə qoşulmağa, onun gələcək fəaliyyətinə töhfə verməyə dəvət edirik”.