Xalq artisti Fərqanə Qasımova qızı Mövlanənin toy mərasimində söylədiyi fikirlərlə bağlı daha bir açıqlama verib. 

KONKRET.az “Unikal”a istinadən xəbər verir ki, xanəndə qızının “Evimdə gördüyüm rahatlığı ərimdən də tələb edirəm” sözlərinə görə onu qınayanları Allaha həvalə etdiyini deyib.

“Biz pis niyyətli və hörmətsiz şərhləri Allaha həvalə edirik. Allah ən gözəl vəkildir. İnsan başqası haqqında nə yazırsa, əslində öz iç dünyasının aynasını göstərir. Cəsarəti çatan bunu üz-üzə desin, klaviatura arxasından yox.

Mövlanə orada pis heç nə deməyib. Sadəcə fikrini ifadə edib və bu, onun xarakterinə xas olan bir üslubdur. Kürəkənim də onu belə sevir, belə görüb. Kimsə bunu qəsdən fərqli yozursa, bu artıq bizim məsuliyyətimiz deyil.

Hər söz hər kəsə yaraşmaya bilər, amma bu, sözün yox, anlayanın səviyyəsidir. Hər kəsin öz həyatında kifayət qədər problemi var. Başqasının həyatını müzakirə etməkdənsə, gedib öz problemlərini həll etsələr, daha faydalı olar”, – deyə Fərqanə Qasımova bildirib.