Müasir dövrdə qadının özündən yaşca kiçik kişi ilə ailə qurması artıq nadir hal kimi qiymətləndirilmir. Lakin belə münasibətlərdə yaş fərqinin emosional yetkinliyə, tərəflərin bir-birindən gözləntilərinə, ailədaxili münasibətlərə və sosial təzyiqlərə təsiri tez-tez müzakirə olunur.
Bəs qadının kişidən yaşca böyük olması ailə münasibətlərinin sağlamlığına və uzunmüddətli davamlılığına təsir göstərə bilərmi?
Mövzu ilə bağlı psixoloq-loqoped Ləman Kazımova KONKRET.az-a açıqlamasında bildirib ki, qadının özündən yaşca kiçik kişi ilə ailə qurması münasibətin sağlamlığına və davamlılığına özlüyündə mənfi təsir göstərən amil deyil. Onun sözlərinə görə, burada əsas məsələ yaş fərqindən daha çox tərəflərin emosional yetkinliyi, həyata baxışları, bir-birinə münasibəti və gözləntiləridir.
Psixoloq qeyd edib ki, belə münasibətlərin müsbət tərəflərindən biri tərəflərin bir-birini tamamlaması və münasibətə fərqli baxışlar gətirməsidir:
“Yaşca kiçik kişi daha enerjili və yeniliklərə açıq olur, qadın isə həyat təcrübəsi və emosional sabitliyi ilə münasibətə fərqli bir balans gətirə bilər. Əgər tərəflər bir-birinin üzərində üstünlük qurmağa çalışmırsa, yaş fərqi münasibətin inkişafına mane olmur”.
Ləman Kazımovanın sözlərinə görə, bununla yanaşı, yaş fərqi bəzi hallarda müəyyən çətinliklərin yaranmasına da səbəb ola bilər. Xüsusilə tərəflərin emosional yetkinlik səviyyəsi fərqli olduqda məsuliyyət bölgüsü, gələcək planları, övlad sahibi olmaq, karyera və həyat tərzi ilə bağlı fikir ayrılıqları ortaya çıxacaq.
Psixoloq əlavə edib ki, ailə və cəmiyyətin münasibətə yanaşması da cütlük üçün əlavə təzyiq yaradacaq:
“Ailənin və cəmiyyətin “qadın kişidən böyükdür” yanaşması tərəflər üzərində sosial təzyiq yarada bilər. Əgər cütlük bu təzyiqi öz münasibətlərinə daşıyırsa, zamanla narahatlıq və konfliktlər artacaq”.
Onun fikrincə, münasibətdə tərəflərdən birinin digərindən yaşca böyük olması avtomatik olaraq onun daha üstün və ya daha yetkin olması anlamına gəlmir. Əsas məsələ münasibətdə qərarların qarşılıqlı şəkildə verilməsi, məsuliyyətlərin ədalətli bölüşdürülməsi və tərəflərin bir-birinə hörmətlə yanaşmasıdır.
“Sağlam münasibətin əsas göstəricisi kimin neçə yaşında olması deyil, tərəflərin bir-birini nə qədər anladığı, hörmət etdiyi və münasibətdə özünü təhlükəsiz hiss etməsidir. Yaş fərqi münasibətin keyfiyyətini müəyyən edən əsas faktor deyil. Emosional yetkinlik, qarşılıqlı hörmət və ortaq dəyərlər daha önəmlidir”.
Beləliklə, qadının özündən kiçik kişi ilə ailə qurması münasibətin uğurlu və ya uğursuz olacağını əvvəlcədən müəyyənləşdirmir. Münasibətin davamlılığında yaş fərqindən daha çox emosional yetkinlik, qarşılıqlı hörmət, ortaq dəyərlər və gələcəklə bağlı gözləntilərin uyğunluğu rol oynayır.
Aynurə İsmayıl
KONKRET.az