Azərbaycanda qadınların pensiya yaşının azaldılması məsələsi yenidən gündəmə gəlib. Son illərdə pensiya yaşının mərhələli şəkildə artırılması cəmiyyətdə müxtəlif müzakirələrə səbəb olur. Xüsusilə, ağır iş şəraitində çalışan və məşğulluq problemi yaşayan qadınlar üçün bu məsələnin yenidən nəzərdən keçirilməsinin vacibliyi vurğulanır.

Bəs mövcud sosial-iqtisadi şəraitdə qadınların pensiya yaşının endirilməsi mümkündürmü?

Mövzu ilə bağlı KONKRET.az-a açıqlama verən Milli Məclisin deputatı Fazil Mustafa bildirib ki, pensiya yaşı əsasən beynəlxalq standartlara və insanların orta ömür uzunluğuna uyğun müəyyən edilir:

“Bizdə ölüm yaşı təxminən 74 yaş civarındadır. Tibbin inkişafı nəticəsində bunun 75-77 yaşa qədər yüksələcəyi proqnozlaşdırılır. Pensiya yaşının artırılması ilə bağlı əsas arqumentlərdən biri də budur. Hazırda işsizlik və məşğulluq problemləri insanların pensiya təminatı məsələsini daha həssas mövzuya çevirib.

İnsanların pensiya təminatı məsələsində yaş amili ciddi narahatlıq doğurur. Bir qrup insan üçün bu çox vacib məsələdir. Prosesi necə düzgün tənzimləmək olar – əsas müzakirə mövzusu budur.”

F.Mustafanın sözlərinə görə, məsələyə cəmiyyətdə birmənalı yanaşma yoxdur:

“Elə insanlar var ki, işlə təmin olunduqlarına görə pensiya yaşının artırılmasını o qədər də problem hesab etmirlər. Amma indiki şərtlərdə müəyyən kateqoriyadan olan qadınlar üçün pensiya yaşının azaldılması insanların həyatını daha da rahatlaşdıra bilər.”

Müşviq Tofiqoğlu
KONKRET.az