Türkmənistandan mühacirət dalğası Müdafiə Nazirliyinin zabitlərinə də təsir edib.

KONKRET.az yerli KİV-ə istinadən xəbər verir ki, bu barədə ölkənin hüquq-mühafizə orqanlarındakı mənbə bildirib.

Qeyd olunub ki, bütün vilayətlərdə istefa xəbərlərinin sayı artır.

Belə ki, hərbi hissələrin, hərbi məktəblərin, hətta hərbi komissarların zabitləri çağırış müddətində rüşvət şəklində yaxşı əlavə gəlir əldə etmələrinə baxmayaraq, işdən çıxaraq xaricə gedirlər.

Mənbə deyir ki, çoxları hərbçilərin xaricə getmədiyinə inanır, lakin bu belə deyil:

“Əvvəllər yerli standartlara görə zabitlər yüksək maaşla saxlanılırdı. Ancaq bu məbləğlə yaşamaq çətindir, xüsusən də ailəli adam üçün. Üstəlik, hərbçilərin çoxu pullarını kirayə mənzillərə verir”.

Qeyd olunub ki, hərbçilərin hər biri 3000-3500 manat (bazar məzənnəsi ilə 160-185 dollar) maaş alır. Bir tərəfdən də Türkmənistanda hətta 2000 manat da yaxşı gəlir sayılır. Ancaq digər tərəfdən, mühacirətdə, tikintidə və ya taksi sürücüsü işləməklə daha çox qazanmaq olur.

Bundan əlavə, hərbçilərdən müxtəlif ehtiyaclar üçün maaşın bir hissəsini müntəzəm olaraq tuturlar.

Məlumatda qeyd olunur ki, çox vaxt hərbçilər Dubaya, Türkiyəyə tətilə getmək üçün əllərində olanları satırlar. Sonra “məzuniyyətdən” geri qayıtmırlar. Oxşar hallar Məryəm vilayətinin hərbi hissələrindən birində və Müdafiə Nazirliyinin Şatlık şəhərindəki anbarında da qeydə alınıb. Elə olub ki, pul olmadığından bu bölmənin əməkdaşları anbardan yeni hərbi forma, ayaqqabı və digər ləvazimatları çıxarıblar.

Qeyd olunur ki, polis və neft-qaz sektorunun əməkdaşları da işlərini kütləvi şəkildə tərk edirlər. Lebap vilayətinin Qazaçaq şəhərində kadrların xaricə axınının qarşısını almaq üçün qaz təsərrüfatı işçilərinin pasportları götürülüb.

Bununla yanaşı, ölkədə işsizlik problemi paradoksal olaraq qalmaqdadır. Kadr çatışmazlığına baxmayaraq, yerli korrupsionerlər işə düzəlmək üçün rüşvət tələb etmək fürsətini əldən vermirlər. Bəzən müəssisənin özünün tapdığı adamlardan da rüşvət tələb olunur.

İqbal Rzayev,

KONKRET.az