Havaların soyuması ilə ölkədə soyuqdəymə və qrip hallarının artması müşahidə olunur. Bu vəziyyət bir çox insanın burun tutulmasını aradan qaldırmaq üçün tez-tez burun damcılarına müraciət etməsinə səbəb olur. Lakin mütəxəssislər xəbərdarlıq edir ki, bu dərmanların nəzarətsiz istifadəsi ciddi sağlamlıq problemlərinə yol aça bilər.
Mövzu ilə bağlı KONKRET.az-a açıqlama verən həkim-terapevt Günay Lətifova bildirib ki, hazırda respirator infeksiyalar sürətlə yayılır və buna bağlı olaraq burun damcılarına tələbat da artıb.
Həkimin sözlərinə görə, bu damcılar burundakı damarları sıxaraq axıntını azaldır və nəfəs almanı rahatlaşdırır. Lakin onların yanlış və çox istifadəsi arzuolunmaz fəsadlar yaradır:
“Ən çox rast gəlinən əks təsirlər burunda quruluq və yanma hissidir. Çox istifadədə isə asılılıq yaranır. Dərmanın təsiri keçdikdən sonra burun daha da çox tutulur ki, bu vəziyyətlə tez-tez qarşılaşırıq”, – deyə Lətifova bildirib.
O, qeyd edib ki, uzunmüddətli və nəzarətsiz istifadə burunun selikli qişasında zədələnmə və iltihabi proses – xroniki rinit yarada bilər.
Həkim həmçinin daha ciddi fəsadlara diqqət çəkib:
- baş ağrıları
- ürək döyüntüsünün sürətlənməsi
- qan təzyiqinin yüksəlməsi
- yuxusuzluq və əsəbilik
- uşaqlarda huşun itməsi və hətta tənəffüs dayanması
Mütəxəssis xəbərdarlıq edir ki, vəziyyət ağırlaşmaması üçün burun damcılarından gün ərzində maksimum bir-iki dəfə istifadə olunmalıdır.
“İnsanlar bu dərmanlardan sui-istifadə etməsinlər. Həddindən artıq istifadənin yaratdığı fəsadlarla tez-tez qarşılaşırıq”, – deyə həkim əlavə edib.
Aynurə İsmayıl
KONKRET.az