Tokio Universitetinin alimləri robotun üzünə insan dərisinin yetkin hüceyrələrini yapışdırıb və bununla da robotun gülümsəmək üsulunu hazırlayıblar.
KONKRET.az xarici mediaya istinadən xəbər verir ki, bu, kosmetika və tibbdə böyük bir irəliləyiş hesab edilir. Araşdırmanın aparıcı alimi Şoji Takeuçinin sözlərinə görə, bu, daha real robotların yaradılması istiqamətində mühüm addımdır.
Gülən robot “Cell Reports Physical Science” jurnalında dərc olunan araşdırmada yer alıb. Bu, Takeuchi komandasının bioloji və mexaniki robot texnologiyalarını birləşdirən on illik tədqiqatının nəticəsidir. Beləliklə, ilk dəfə canlı dəri ilə manipulyasiya etmək mümkün oldu.
Gələcəkdə tədqiqatçılar qan dövranı sistemi və sinirlər də daxil olmaqla laboratoriyada sintez edilmiş dəriyə daha çox həqiqi dərinin elementlərini əlavə etməyi planlaşdırırlar. Bu, dəri tərəfindən sorulan kosmetika və dərmanlar üçün daha təhlükəsiz sınaq platformalarına səbəb ola bilər.
Takeuçinin fikrincə, canlı toxuma beyin və əzələlərin enerji səmərəliliyindən dərinin özünü sağaltma qabiliyyətinə qədər metallar və plastiklər üzərində bir çox üstünlüklərə malikdir. O, həmçinin robotlar üçün daha real və funksional dəri istehsal etməyə kömək edəcək.
“Mən düşünürəm ki, insanlarla eyni materiallardan robotlar hazırlamaq və onlara emosiyaları ifadə etməyi öyrətmək insanlarla maşınlar arasında körpü qurmağın açarlarından biri ola bilər”, – deyə yapon alimi vurğulayıb.
Rəsmiyyə Şərifova,
KONKRET.az