Rusiyanın bir çox elita nümayəndələri getdikcə daha çox Federal Təhlükəsizlik Xidmətinin (FTX) nəzarətdən çıxdığından narahatdır. Buna səbəb isə ölkə Prezidenti Vladimir Putinin Ukraynadakı müharibə fonunda hakimiyyətini qorumaq üçün bu quruma daha geniş səlahiyyətlər verməsidir.
KONKRET.az xəbər verir ki, bu barədə “Bloomberg” yazır.
Nəşrin məlumatına görə, “Telegram”ın həmtəsisçisi və milyarder Pavel Durova qarşı terrorçuluq ittihamının irəli sürülməsi FTX tərəfindən repressiyaların gücləndirilməsi dalğasının son nümunəsidir. Bu barədə Kremlə yaxın mənbələr bildiriblər. Onlar həssas məsələləri müzakirə etdikləri üçün adlarının açıqlanmasını istəməyiblər.
Mənbələr qeyd edirlər ki, Putin uzun illər təhlükəsizlik məsələlərində sərt xətt tərəfdarları ilə iqtisadiyyata fokuslanan daha mülayim məmurlar arasında balans saxlayıb. Lakin hazırda Kreml daxilində bir çoxları hesab edir ki, Rusiya lideri getdikcə daha çox biznes və cəmiyyət üzərində sərt nəzarətin tərəfdarlarına üstünlük verir.
Bu vəziyyət gərginliyi artırır, çünki FTX öz təsir dairəsini genişləndirir və hakimiyyətinə qarşı açıq məhdudiyyətlər görünmür. Eyni zamanda, Putinin daxili siyasət üzrə güclü rəhbəri Sergey Kiriyenko kimi yüksək vəzifəli şəxslərin təsir imkanları azalır.
Mənbələrin məlumatına görə, Kiriyenko yaxın vaxtlarda Rusiyanın Ermənistan, Moldova və Macarıstandakı siyasi əməliyyatlarının uğursuzluqlarına görə tənqid olunub.
Moskvalı siyasi analitik Andrey Kolesnikov bildirib:
“FTX ölkənin idarəedici şirkətinə çevrilib. Siyasi administrasiya, Xarici İşlər Nazirliyi və maliyyə-iqtisadi blok xüsusi xidmət orqanlarının maraqları nəzərə alınaraq qəbul edilən qərarları icra edən texniki heyətə çevrilib”.
“Bloomberg” yazır ki, keçmiş KQB əməkdaşı və FTX rəhbəri olmuş Putin müharibənin adi rusiyalılar üçün daha görünən hala gəldiyi bir vaxtda hakimiyyətini qorumaq üçün təhlükəsizlik aparatına güvənir.
Nəşr qeyd edir ki, Ukraynanın neft emalı zavodlarına, müdafiə müəssisələrinə və logistika anbarlarına zərbələri Rusiyanın dərinliklərinə qədər çatır və Kremlın münaqişənin nəzarət altında olması ilə bağlı iddialarını zəiflədir.
“Karnegi Rusiya-Avrasiya” Mərkəzinin baş elmi əməkdaşı Tatyana Stanovaya bildirib ki, Rusiya elitaları müharibə ilə bağlı artan çağırışların öhdəsindən sistemin gələ bilməməsindən getdikcə daha çox narahatdır və Putinin güzəştə getməyə hazır olduğuna dair heç bir əlamət yoxdur.
“Əsas problem ondan ibarətdir ki, Rusiya rəhbərliyinin reallıqla əlaqəsini itirdiyi hiss olunur. Putinin Ukraynanı tabe etdirmək məsələsinə həddindən artıq fokuslanması effektiv idarəetməni əhəmiyyətli dərəcədə çətinləşdirib”, – deyə o bildirib.
Eyni zamanda, “Yeni Avrasiya Strategiyaları” analitik mərkəzinin sosioloqu və elmi əməkdaşı Ella Paneax qeyd edib ki, repressiya atmosferi həm elita arasında, həm də Rusiyanın orta təbəqəsi daxilində yayılır.
Rəsmiyyə Şərifova,
KONKRET.az