Yüzlərlə vətəndaş pensiya yaşına çatdıqdan sonra əmək pensiyası almaq üçün tələb edilən şərtləri ödəyə bilmədiyindən yaşa görə sosial müavinətlə təmin olunur. Lakin sonradan işləyərək sığorta stajını və digər zəruri şərtləri tamamlayan şəxslərin əmək pensiyası almaq hüququ qazanıb-qazanmayacağı bir çoxlarını maraqlandırır.

Bəs sosial müavinət alan şəxs sonradan 25 illik sığorta stajını tamamlayarsa, ona yaşa görə əmək pensiyası təyin edilə bilərmi?

Mövzu ilə bağlı KONKRET.az-a açıqlama verən Liberal İqtisadçılar Mərkəzinin sədri Akif Nəsirli bildirib ki, pensiya yaşına çatdığı zaman yaşa görə əmək pensiyası almaq üçün tələb olunan şərtləri ödəyə bilmədiyindən sosial müavinət alan şəxs sonradan işləyərək qanunvericilikdə nəzərdə tutulan tələbləri yerinə yetirərsə, yaşa görə əmək pensiyası almaq hüququ qazanacaq.

Akif Nəsirli

Ekspertin sözlərinə görə, belə hallarda vətəndaş müvafiq sənədlərlə müraciət etdikdən sonra onun pensiya hüququ yenidən qiymətləndirilir.

“Əgər müəyyən edilərsə ki, artıq yaşa görə əmək pensiyasının təyin olunması üçün bütün şərtlər mövcuddur, həmin şəxsə ödənilən sosial müavinət dayandırılır və onun əvəzində yaşa görə əmək pensiyası təyin edilir”.

İqtisadçı vurğulayıb ki, təkcə 25 illik sığorta stajının tamamlanması əmək pensiyası hüququnun yaranması üçün hər zaman kifayət etmir.

Onun sözlərinə görə, pensiyanın təyin edilməsi zamanı qüvvədə olan qanunvericilikdə nəzərdə tutulan digər meyarlar, o cümlədən şəxsin fərdi hesabında toplanmış pensiya kapitalının həcmi də nəzərə alınır.

Akif Nəsirli əlavə edib ki, bu səbəbdən hər bir müraciət fərdi qaydada araşdırılır və yekun qərar qanunvericiliyin tələblərinə uyğun olaraq verilir.

Aynurə İsmayıl
KONKRET.az