Qazaxıstanın paytaxtı Astanada 20 Yanvar faciəsinin növbəti ildönümü münasibəti ilə tədbir keçirilib.

KONKRET.az-ın Mərkəzi Asiya ölkələri üzrə bürosu xəbər verir ki, Səfirliyin təşkilatçılığı ilə təşkil edilən tədbirdə Azərbaycan diasporunun nümayəndələri iştirak edib.

Azərbaycanın Qazaxıstandakı səfiri Ağalar Atamoğlanov bildirib ki, xalqımız böyük qurbanlar bahasına əldə etdiyi müstəqilliyin necə əvəzsiz bir miras olduğunu bir daha böyük qürur hissi ilə qeyd edir.
Onun sözlərinə görə, qanlı Yanvar qırğını bir daha göstərdi ki, xalqın əzmini, iradəsini heç bir düşmən qıra bilməz. Diplomat ən yeni tariximizin şərəfli səhifələrindən biri sayılan 20 Yanvar faciəsi barədə geniş məlumat verdi. Vurğulandı ki, xalqımızın azadlıq və suverenlik uğrunda apardığı mübarizə nəticəsində Qarabağ erməni işğalçılarından azad edildi və bununla da ərazi bütövlüyünün və suverenliyinin əbədiliyi bütün dünyaya nümayiş etdirildi.

Diplomat qeyd edib ki, 1988-ci ildən erməni separatistlərinin başlatdığı təcavüzkarlıq aktlarına etiraz olaraq ərazi bütövlüyü uğrunda mübarizəyə qalxan dinc əhaliyə qarşı silahlı müdaxilə yüzlərlə günahsız insanın qətlə yetirilməsi və yaralanması ilə nəticələndi. Bu, totalitar sovet rejiminin süqutu ərəfəsində onun cinayətkar mahiyyətini bir daha bütün dünyaya nümayiş etdirdi. Amma, Bakıda kütləvi şəkildə həyata keçirilən bu ağlasığmaz vandallıq aktı insanlarımızı ruhdan salmadı, əksinə, Azərbaycan xalqını ölkənin müstəqilliyi uğrunda daha da sıx birləşdirdi və gücləndirdi. Həmin hadisələr bir qəhrəmanlıq səlnaməsinə çevrildi və müstəqilliyin nə qədər böyük bir dəyər olduğunu heç zaman silinməyəcək şəkildə yaddaşımıza həkk etdi.

Çıxış edən digər natiqlər də çətin illərdə Azərbaycan ziyalılarının, xüsusilə Ulu öndər Heydər Əliyevin cəsarətli mövqeyinin xalqın əzmkarlığında, haqsızlığa qarşı inamlı duruşunda böyük rol oynadığını vurğulayıb.