Beynəlxalq Cinayət Məhkəməsinin (BCM) dünənki qərarı geniş müzakirə mövzusuna çevrilib. Söhbət  İsrailin baş naziri Benyamin Netanyahu və keçmiş müdafiə naziri Yoav Gallantın həbsinə order verilməsindən gedir. Avropa dövlətləri BCM-in qərarını dəstəkləsə də ABŞ buna sərt reaksiya verib. Pentaqon rəsmi şəkildə  qərarı rədd etdiyini bildirib. Pentaqonun mətbuat katibinin müavini Sabrina Sinq brifinqində jurnalistlərə bildirib ki, ABŞ BCM-nin həbs qərarını köklü şəkildə rədd edir: “Biz prokurorun tələskənliyindən və baş vermiş bəzi proseslərdən narahatıq. Həm də BCM bu məsələ ilə bağlı yetərli yurisdiksiyaya malik deyil.” Yeri gəlmişkən,BCM Netanyahu və Gallantı müharibə cinayətləri, o cümlədən aclıqdan müharibə üsulu kimi istifadə etmək və mülki insanları hədəf almaqda ittiham edib.

Prezident Bayden də məhkəmənin qərarını pisləyib:”BCM-nin İsrail liderlərinə qarşı həbs orderi verməsi yolverilməzdir.Beynəlxalq Cinayət Məhkəməsinin nəyi nəzərdə tutduğunu deyə bilmərəm. Biz həmişə İsrailin yanında olacağıq”.

İsrail prezidenti İsaak Hersoq da məhkəmənin qərarını pisləyib: “Pis niyyətlə qəbul edilən qərar ümumbəşəri ədaləti universal gülüş obyektinə çevirdi.Bu, müttəfiqlərin nasistlər üzərində qələbəsindən bu günə qədər ədalət uğrunda mübarizə aparanların hamısının fədakarlığına lağ edir.”

İsrail BCM-nin həbs qərarlarını təsdiq etməsinə mane olmaq üçün bir neçə uğursuz cəhd göstərib. Onlar əvvəlcə BCM-nin İsrail üzərində yurisdiksiyasının olmamasını iddia ediblər. Sonra məhkəmənin qərar qəbul etməsinə mane ola bilməyiblər.

Vəli Həsənoğlu,

KONKRET.az