Bakı Apellyasiya Məhkəməsində yol qəzası törətməkdə təqsirləndirilən Adil Hümbətovun (adı, soyadı şərtidir) barəsindəki hökmdən apellyasiya şikayəti üzrə məhkəmə iclası yekunlaşıb.
KONKRET.az pravdaaz-a istinadən xəbər verir ki, hakim Murad Məmmədovun sədrliyi ilə keçirilən prosesdə qərar elan olunub.
Qərara əsasən, zərərçəkmiş şəxsin hüquqi varisinin apellyasiya şikayəti təmin edilməyib.
İttihama görə, Adil Hümbətov “İsuzu Citibus” markalı avtobusu yol vərəqəsi əsasında 2025-ci il tarixdə saat 19:54 radələrində paytaxtın Xətai rayonu ərazisində idarə edib. Həmin vaxt avtobusun sürəti təxminən 10 km/saat olub.
Sürücü hərəkətdə olarkən “Yol hərəkəti haqqında” Azərbaycan Respublikası Qanununun 60-cı maddəsinin 2-ci hissəsinin tələblərini pozub. Həmin normaya əsasən, svetoforun və ya nizamlayıcının qadağanedici siqnalı verildikdə sürücü nəqliyyat vasitəsini stop-xətti qarşısında, belə xətt olmadıqda isə piyadaların hərəkətinə maneə törətmədən kəsişən yolun hərəkət hissəsi qarşısında dayandırmalıdır. Piyada keçidi qarşısında və digər yol ayrıclarında isə nəqliyyat vasitəsinin svetofor qarşısında saxlanılması tələb olunur. Lakin Adil Hümbətov bu tələbə əməl etməyib.
Belə ki, o, R.Məmmədov küçəsində svetoforun qırmızı işığında avtobusla hərəkətini davam etdirib. Bununla da avtobusun hərəkəti digər hərəkət iştirakçıları üçün təhlükəli vəziyyət yaradıb.
Hadisənin svetoforla nizamlanan yolayrıcında baş verdiyi qeyd olunur. Avtobusun ön sol hissəsi yolun sağ tərəfindən sola doğru hərəkət edən piyada Elçin Baxşıyevə dəyib. Zərbənin nəticəsində piyada ağır xəsarətlər alıb. Hadisədən sonra ağır vəziyyətdə xəstəxanaya yerləşdirilən piyadanın vəziyyəti kritik olub. Daha sonra o, həmin xəstəxanada vəfat edib.
Beləliklə, sürücünün yol hərəkəti qaydalarını pozması nəticəsində bir nəfərin ölümü ilə nəticələnən yol-nəqliyyat hadisəsi baş verib.
Xətai Rayon Məhkəməsinin hökmü ilə Adil Hümbətov 5 il müddətinə azadlıqdan məhrum edilib. Hökmə əsasən, təyin edilmiş cəzanın məntəqə tipli cəzaçəkmə müəssisəsində çəkilməsi müəyyən olunub. Hökmdən narazı qalan zərərçəkmiş şəxsin hüquqi varisi apellyasiya şikayəti verib.