Orta Asiya ölkələrinin dövlət başçılarının ikinci məşvərət görüşü noyabrın 27-də Daşkənddə keçiriləcək. KONKRET.az-ın Orta Asiya ölkələri üzrə bürosunun verdiyi məlumata görə, bu barədə Qazaxıstanın ilk prezidenti Nursultan Nazarbayev danışıb.
Nazarbayev bu görüşün “planlaşdırıldığı kimi Daşkənddə olacağına” ümid etdiyini bildirib. O qeyd edib ki, Qırğızıstan, Tacikistan və Özbəkistan arasında həll edilməmiş məsələlər var, “toqquşmalar baş verir, insanlar ölür”.
Xatırladaq ki, 2017-ci ilin sentyabrında Özbəkistan Prezidenti Şövkət Mirziyayev BMT Baş Assambleyasının 72-ci sessiyasında çıxış edərək, Orta Asiya ölkələri dövlət başçılarının qeyri-rəsmi görüşünün keçirilməsini səsləndirmişdi.
Orta Asiya ölkələri dövlət başçılarının ilk məşvərət görüşü 2018-ci ilin mart ayında Qazaxıstanın paytaxtında keçirilib. Bu ilin iyul ayında Özbəkistan Xarici İşlər Nazirliyi ikinci görüşün payızda Daşkənddə keçiriləcəyini bildirib.