“NATO Rusiyaya qarşı təcavüz etmək niyyətində deyil”.

KONKRET.az xarici mediaya istinadən xəbər verir ki, bu barədə ABŞ-ın dövlət katibi Entoni Blinken deyib. O hesab edir ki, Şimali Atlantika Alyansı Rusiyaya qarşı aqressiv addımlar atmaq niyyətində deyil:

“Düşünürəm, ən mühüm şeyi Putin görmür, yaxud görməzlikdən gəlir.  Bu, NATO-nun müdafiə ittifaqı, şəffaf ittifaq olmasıdır. Bu, Rusiyaya qarşı yönəlmiş, Kremlə qarşı aqressiv addımlar atmaq niyyətində olan alyans deyil”  – Blinken vurğulayıb.

Onun sözlərinə görə, son illər bu regionda müşahidə edilən yeganə təcavüz təəssüf ki, Rusiyadan gəlib: “Əvvəlcə Gürcüstana, sonra isə Ukraynaya təcavüz edib. Hazırda mövcud olan yeganə təhlükə Rusiyanın Ukraynaya qarşı yeni təcavüzüdür. Biz bunun baş verməməsini həqiqətən istəyirik” – deyə o bildirib.

Blinkenin sözlərinə görə, Moskvanın hərəkətləri NATO-nu müdafiəsini gücləndirməyə məcbur edib. “Prezident Putin bunu nəzərə almalıdır və əgər təhlükəsizliklə bağlı qorxuları varsa, o zaman təxribat xarakterli hərəkətlərə əl atmamalı və Alyansı müdafiəsini gücləndirməyə məcbur etməməlidir” – Blinken fikirlərini tamamlayıb.

Müşviq Tofiqoğlu

KONKRET.az