“Hakimiyyət dəyişikliyindən sonra “suveren” sözünü tez-tez eşitdik. Eyforiyada bir çoxlarına elə gəlirdi ki, suverenlik istəklə qurulub. Suveren olmaq istəyirsinizsə, edəcəksiniz”.

KONKRET.az xəbər verir ki, bu fikirləri politoloq Suren Sarkisyan Facebook səhifəsində yazıb. O, qeyd edib ki, “Hər şey o qədər də sadə deyil. Məsələn, Ermənistan hökumətinin Rusiya tərəfi üçün qəbuledilməz kadrlarla “doldurulması” suveren “qərarımız” idi. Dedik: kimi istəsək, istədiyimiz yerə təyin edərik. Suveren qərarlar veririk. Rusiyanı vecimizə almadıq. İran, Gürcüstan və digər ölkələri bizim üçün düşmən edə biləcək suveren qərarlar qəbul etdik. Suveren idik axı. İndi də anlamırıq”.

Politoloq daha sonra yazır: ”Belə suveren dövlətlər yoxdur! Həmişə qərarlar qəbul edərkən, hətta supergüclər müttəfiqlərinin və ya ortaqlarının maraqlarını hesablayır. ABŞ kimi bir super güc belə. Baxın, ABŞ “erməni soyqırımı”nı tanıya bilməz. Bütün reallıqları dərk etməsinə baxmayaraq, yenə də Türkiyəyə baxır…

Deməli, eyforiya sonrası həqiqi depressiyaya girəcəyinizi bilməklə bu “eyforik suverenliyin” elementindən çıxmalısınız. Suverenlik duyğularla deyil, praqmatizmi hesablamaqla əldə edilir”.

Surxay Atakişiyev,

KONKRET.az.