Bu gün ölkəmizi təmsil edən iki qrossmeysterin qarşılaşmasında Teymur Rəcəbov Şəhriyar Məmmədyarovu məğlub edib.

KONKRET.az bildirir ki, təmsilçilərimizin arasındakı hər iki partiya heç-heçə ilə nəticələndikdən sonra şahmatçılar münasibətlərini tay-breykdə aydınlaşdırmalı olublar. Yenə də ilk iki partiyada qalib müəyyən olunmayıb.

Sonuncu iki ondəqiqəlik partiyada isə vəziyyət dəyişib. Əvvəlcə Rəcəbovun ağ fiqurlarla oynadığı partiya da heç-heçə qeydə alınıb, amma cavab oyununda Teymur həmyerlisinə qalib gəlib.

Beləliklə, Teymur Dünya Kubokunun 1/4 finalına yüksəlib. O, tay-breykdə polşalı Yan Kşiştof Duduya qalib gəlmiş Çin mənşəli amerikalı Ceffri Syünlə qarşılaşacaq.