Sevimli siyasi sirkimizin növbəti buraxılışına xoş gəlmisiniz!
Bu gün proqramımızda üç nömrə var. Hamısı sığortasız ifa olunur, amma dövlət büdcəsi hesabına maliyyələşdirilir.
Manejdə isə Kremlin mətbuat katibi, Rusiyanın Almaniyadakı səfiri və başqasının bank hesablarının taleyinə həddindən artıq həssas yanaşan bir diplomat çıxış edəcək.
BİRİNCİ NÖMRƏ. PESKOV KONSTANTİNOVKANI SAĞLAM DÜŞÜNCƏDƏN AZAD ETDİ!
Noyabrın 13-də TASS Dmitri Peskovun Ukraynanın bəyanatlarında Rusiyanın Konstantinovka üzərində nəzarətinin tanınması əlamətlərini gördüyü barədə məlumat yaydı.
Necə yəni?!
Hər şey çox sadədir.
Ukrayna tərəfi Rusiyanın təklif etdiyi humanitar missiyadan zirehli texnikanın daşınması və ya hərbi qulluqçuların rotasiyası üçün istifadə edə biləcəyindən narahatlığını bildirib.
Peskov isə bundan belə nəticə çıxarıb: əgər ukraynalılar Rusiya qoşunlarının rotasiyasından ehtiyat edirlərsə, deməli, Rusiyanın şəhərə nəzarət etdiyini qəbul edirlər!
Dahiyanə məntiq!
Bu məntiqlə, əgər mənzilinizə oğruların girəcəyindən qorxursunuzsa, deməli, onları artıq evinizin qanuni sahibi kimi tanımısınız.
Metroda cibgirlərdən ehtiyat edirsinizsə, cüzdanınız hüquqi baxımdan onların mülkiyyətidir.
Peskov sabah Rusiya qoşunlarının Ayı idarə etdiyini bəyan etsə, yəqin ki, NASA da təcili təkzib yaymağa məcbur qalacaq.
Məsələnin ən ironik tərəfi budur ki, Moskva müharibə meydanına çevrilmiş şəhərdə humanitar əməliyyat keçirməyi təklif edir. Halbuki bu müharibəni başladan da elə Rusiyanın özüdür.
Ukraynanın ombudsmanı Dmitri Lubinets isə belə bir birgə missiyanın hazırlanmasından xəbərdar olmadığını bildirib.
Amma bu, Kremlin məntiqini dayandıracaqmı?
Konstantinovkaya daxil olmağa ehtiyac yoxdur. Mətbuat mərkəzinə girib qələbə elan etmək kifayətdir!
İKİNCİ NÖMRƏ. RUSİYA ALMANİYAYA SEVGİSİNİ ETİRAF ETDİ! BERLİNƏ QAPILARINI MÖHKƏMLƏTMƏK TÖVSİYƏ OLUNUR!
Noyabrın 13-də Rusiyanın Almaniyadakı səfiri Sergey Neçayev Kildə çıxış edərək heyrətamiz açıqlama verib.
Onun sözlərinə görə, Moskva Almaniya ilə münasibətlərin normallaşdırılmasına açıqdır, Avropa ilə müharibə aparmaq istəmir və ümumiyyətlə, dostluğa ümid edir.
Səfir hətta iki ölkə arasında münasibətlərin ən yaxşı dövrlərini də xatırladıb.
Nə qədər təsirli etirafdır!
Yaxın vaxtlara qədər Rusiya təbliğatı Avropa paytaxtlarını hədələməklə məşğul idi. İndi isə Rusiya diplomatiyası Almaniyanın eyvanı altında əlində gül dəstəsi serenada oxuyur:
“Almaniya, geri qayıt! Biz hər şeyi başa düşdük! Yaxşı, demək olar ki, hər şeyi. Üstəlik, əslində günahkar özünsən!”
Səfir Avropa siyasətçilərinin Rusiyanın gələcəkdə NATO-ya hücum edə biləcəyi ilə bağlı narahatlıqlarını da absurd adlandırıb.
Doğrudan da, avropalılar niyə narahat olsunlar ki?
Axı 2022-ci ildən bəri Rusiyanın Ukraynaya qarşı başlatdığı genişmiqyaslı müharibə davam edir. Amma bu, yəqin ki, tamam başqa məsələdir.
Kreml diplomatiyasının məktəbi həqiqətən heyrətamizdir: əvvəlcə qonşunun pəncərələrini sındır, sonra digər sakinlərin zirehli qapılar quraşdırmasına etiraz et. Sonda isə hamıya birlikdə yeni təhlükəsizlik arxitekturası qurmağı təklif et.
Əsas odur ki, bu dəfə memarların əlində yenə çəkic olmasın!
ÜÇÜNCÜ NÖMRƏ. RUSİYA XİN-DƏ HƏYƏCAN: AVROPA PULLARI GİZLƏDİR! DONDURULMUŞ MİLYARDLARIN TALeyi DİPLOMATLARI NARAHAT EDİR!
Noyabrın 14-də TASS Rusiya Xarici İşlər Nazirliyinin İqtisadi Əməkdaşlıq Departamentinin direktoru Dmitri Biriçevskinin müsahibəsini dərc edib.
Diplomat Avropanın dondurulmuş Rusiya aktivlərini “Euroclear” depozitarisindən başqa strukturlara köçürərək gizlətməyə çalışmasından narazılığını bildirib. O, bu vəsaitlərin mümkün mənimsənilməsini isə qarət adlandırıb.
Burada orkestrdən bir anlıq susmağı xahiş etmək istərdim.
Çünki Ukraynaya qarşı işğalçı müharibə aparan dövlətin nümayəndəsinin dilindən “qarət” sözünü eşitmək xüsusi ironik səslənir.
Rusiya Ukrayna ərazilərini işğal edib, şəhərləri dağıdıb, müəssisələri və infrastrukturu məhv edib. Amma söhbət dondurulmuş Rusiya milyardlarından gedəndə Xarici İşlər Nazirliyində birdən-birə beynəlxalq hüquqa, müqavilələrə və mülkiyyət toxunulmazlığına böyük sevgi yaranır!
Deməli, başqasının əmlakına toxunmaq olmaz.
Bu fikri bir yerə yazın. Mümkünsə, böyük hərflərlə. Sonra da surətini Kremlə göndərin.
Yeri gəlmişkən, Rusiya aktivləri hələ ki, yoxa çıxmayıb. Onların hüquqi statusu, mümkün müsadirəsi və Ukraynaya yardım məqsədilə istifadəsi Avropada mürəkkəb hüquqi və siyasi müzakirələrin predmetidir.
Yəni pul hələ də yerindədir.
Rusiya diplomatiyası isə artıq onun üçün dəfn mərasimi təşkil edib!
Beləliklə, bugünkü tamaşadan üç mühüm nəticə çıxardıq:
* Rusiya şəhərlərini bəzən hərbi əməliyyatlarla deyil, rəqibin bəyanatlarının qrammatik təhlili ilə də “ələ keçirmək” mümkündür.
* Avropa ilə müharibə aparmaq, eyni zamanda həmin Avropaya dostluq təklif etmək olar.
* Beynəlxalq hüquq xüsusilə öz pulundan söhbət gedəndə çox qiymətli prinsipə çevrilir.
TASS-a bugünkü tamaşaya görə təşəkkür edirik!
Rusiya məmurlarının açıqlamalarını izləməyə davam edin. Biz də izləyirik. Sadəcə, tamamilə başqa səbəbdən.
Sağlam düşüncənizi qoruyun. Görünür, bəzi redaksiyalarda onun ehtiyatı artıq tükənib.
Hazırladı: Ağagül Mürsəlov,
KONKRET.az