Hindistan və Yaponiyanın quru qoşunları bölmələri Mahacan hərbi bazasında (qərbi Racastan ştatı) taktiki təlimə başlayıb.
KONKRET.az xəbər verir ki, bu barədə “The Times of İndia” məlumat yayıb.
Martın 9-dək davam edəcək təlimlərin məqsədi iki ölkə hərbçilərinin döyüş əməkdaşlığının gücləndirilməsi və birgə əməliyyatlar zamanı qarşılıqlı fəaliyyətin təkmilləşdirilməsidir. Təlimlərdə Yaponiya Silahlı Qüvvələrinin 34-cü piyada alayının və Hindistanın “Rajputana Tüfəngləri” ordu batalyonunun əsgərləri iştirak edir.
Qəzet Hindistanın Müdafiə Nazirliyindəki mənbəyə istinadən yazır: “Dharma Guardian təlimləri Hindistan və Yaponiya arasında müdafiə tərəfdaşlığını gücləndirəcək, həmçinin hər iki ölkə ordusunun döyüş bacarıqlarını artıracaq”.
Qeyd edək ki, 2015-ci ildən Yaponiya Avstraliya, Hindistan və ABŞ tərəfindən keçirilən Malabar dəniz təlimlərinin daimi iştirakçısına çevrilib.
Rəsmiyyə Şərifova,
KONKRET.az