Özbəkistan hakimiyyəti məktəblərdə, uşaq bağçalarında və yaşayış məntəqələrində avtomobillərin hərəkət sürəti məhdudlaşdırılıb.

KONKRET.az-n Mərkəzi Asiya ölkələri üzrə bürosu xəbər verir ki, Özbəkistanda məktəblərin və məktəbəqədər müəssisələrin ətrafındakı yollarda nəqliyyat vasitələrinin sürəti 30 km/saatdan, yaşayış məntəqələrində və ona bitişik ərazilərdə (evlər arası boşluqlar) 20 km/saatdan çox olmamalıdır.

Hökumətin “Yol Hərəkəti Qaydaları”na etdiyi dəyişikliklər mayın 1-dən qüvvəyə minəcək.

“Məktəb və uşaq bağçalarının qarşısında sürət 30 km/saatdan çox olmamalıdır. Bəzi hərəkətli küçələrdə sürəti indiki 70 km/saatdan 60 km/saata endirmək lazımdır”, – deyə Şavkat Mirziyoyev bildirib.

Yeni dəyişikliyə əsasən sərnişinlər də təhlükəsizlik kəməri taxmağa məcburdur. Mövcud qaydalarda bu tələb aydın şəkildə göstərilməyib.

Hökumətin aprelin 12-də yol hərəkəti qaydalarına etdiyi digər dəyişikliklər aşağıdakılardan ibarətdir:

– Damda bərkidilmiş yükün hündürlüyü bir metrdən çox olmadıqda (xüsusi qurğularla velosipedlərin daşınması istisna olmaqla), uzunluğu isə avtomobilin ölçülərindən yarım metrdən çox olmadıqda avtomobillərdə yüklərin daşınmasına icazə verilir.

– Yük avtomobilləri yalnız yolun sağ tərəfində hərəkət etməlidir, istisnalar yol hərəkəti qaydalarında göstərilib;

– avtonəqliyyat vasitələrini döngələrdə, o cümlədən ondan 30 metr əvvəl və ya ondan sonra saxlamaq qadağandır;

– Gecə və ya görünmə şəraiti çətin olan yollarda hərəkət edən velosipedçilər xüsusi elementləri olan paltar geyinməlidirlər.